އިސްލާމްދީނާ ދުރު ސިޔާސަތުތައް ތަންފީޒުކުރާ ކޮންމެ ފަހަރަކު، ގައުމުގެ މިނިވަންކަން ގެއްލިފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ވިދާޅުވެއްޖެއެވެ.
ހއ. އުތީމުގައި ބޭއްވި ގައުމީ ދުވަހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ގައުމީ ދުވަހުން ލިބިދޭ އެންމެ ބޮޑު ފިލާވަޅަކީ މާތްވެތިވެގެންވާ އިސްލާމްދީނަށް ވަފާތެރިވުމުން ލިބޭ ފޮނި ނަތީޖާ އާއި، އެ ދީނަށް އިހާނެތިކޮށް ހިތުމުން ކުރިމަތިވާ ހިތިކަމާއި ނިކަމެތިކަން ކަމަށެވެ. ގައުމިއްޔަތުގެ ކޮންމެ ސިފައެއް ބިނާވެފައިވަނީ ދީނީ އަސާސްތަކުގެ މައްޗަށްކަން ފާހަގަކުރައްވަމުން، އިސްލާމްދީނަކީ ދިވެހި ގައުމުގެ ނާރެސް ކަމަށާއި، ކީރިތި ޤުރްއާނަކީ ދިވެހި ގައުމިއްޔަތުގެ އަސްލު ކަމުގައި އެމަނިކުފާނު ސިފަކުރެއްވިއެވެ.
ޕޯޗުގީޒުންގެ އަޅުވެތިކަމުގައި ދިވެހިރާއްޖެ އެތައް އަހަރަކު ހިތްދަތި ތަހައްމަލުތަކެއް ކުރަންޖެހުނީ، ދިވެހިންގެ ތެރެއިން އެކަކު އިސްލާމްދީން ދޫކޮށްލުމުގެ ސަބަބުންކަން ހަނދުމަފުޅު އާކުރައްވަމުން ރައީސް ވިދާޅުވީ، އެ ހިސާބުން އޭނާ އާއި ދިވެހި ފަސްގަނޑާ ދެމެދު އޮތް ރޫހާނީ ގުޅުން ކެނޑި، ވަތަނީ ލޯތްބާއި ކުލުނުގެ އަސާސްތައް މުޅިން ފުނޑުފުނޑުވެގެން ދިޔަ ކަމަށެވެ. ދީން ދޫކޮށްލުމަކީ ހަމައެކަނި ދީނަށް ވީ ހިޔާނާތެއް ނޫން ކަމަށާއި، އެއީ ދިވެހި ގައުމަށާއި ދިވެހި ދައުލަތަށް ވެސް ވީ ބޮޑު ހިޔާނާތެއްކަން އެމަނިކުފާނު ފާހަގަކުރެއްވިއެވެ. މީގެ އިތުރުން، އެއީ ދިވެހީންގެ މިނިވަންކަމާއި، ސިޔާދަތާއި، އިސްތިގުލާލުގެ އިތުރުން ދިވެހީންގެ އަބުރާއި މުޅި ތާރީހަށް ވެސް ވީ ހިޔާނާތެއް ކަމުގައި ރައީސް ވިދާޅުވިއެވެ.
”ދީން އަޅުގަނޑުމެންނަށް ލިބިދެނީ ދެ ދުނިޔޭގެ ބާއްޖަވެރިކަން. ދީނުގައި އެ ފަދަ މަތިވެރި ބާރެއް، އެ ފަދަ ދިރުންހުރި ރޫހެއް އެކުލެވިގެންވޭ. އުތީމު މަހާރަދުން ޖިހާދުކުރެއްވީ ދީނަށްޓަކައި. މި ލޮބުވެތި އުތީމު ފަސްގަނޑުގައި އެހެރަ ކަނދުވަލު މިސްކިތުގައި އުތީމު ތިންބޭން ހަނގުރާމައިގެ ދިދަ ބެންނެވީ މާތްވެގެންވާ އިސްލާމްދީނަށްޓަކައި. ހަނގުރާމައިން ހާސިލުކުރައްވަން ބޭނުންފުޅުވާ އަމާޒު އެ ބޭފުޅުން ކަނޑައެޅުއްވި ގޮތް އަޅުގަނޑުމެން ހަނދާން އެބަހުރި. އެއީ މާތްވެގެންވާ އިސްލާމްދީނާއި، ދިވެހިރާއްޖޭގެ ސަލާމަތަށްޓަކައި ނަސްރު ލިބިވަޑައިގަންނަވަންދެން ޖިހާދުކުރެއްވުން. ނޫނީ ޝަހީދުވެގެން ފުރިހަމަ މުސްލިމެއްގެ ގޮތުގައި މާތްﷲ ގެ ރަހުމަތަށް ވާސިލުވުން. އެހެންވީމާ މިކަމުން ވެސް ގައުމީ ދުވަހުގެ ހާދިސާއާ މާތްވެގެންވާ އިސްލާމްދީނާ އޮތް ގުޅުން ނިކަން ފުރިހަމައަށް އެބަފެނޭ.“ – ރައީސް ވިދާޅުވިއެވެ.
ރައީސް އިތުރަށް ވިދާޅުވި ގޮތުގައި، އިސްލާމްދީން ހިމާޔަތްކުރެވޭނެ ފުރިހަމަ ނިޒާމެއް ގައުމުގައި ފުރިހަމައަށް ގާއިމުވެފައި އޮތުމަކީ ކޮންމެހެން ބޭނުންތެރި ކަމެކެވެ. ރާއްޖޭގެ ގާނޫނުއަސާސީގައިވާ ފަދައިން، އިސްލާމްދީނުގެ އަސްލުތަކާ ހިލާފު އެއްވެސް ގާނޫނެއް ރާއްޖޭގައި ނުހެދޭނެކަން ފާހަގަކުރައްވައި، ހުރިހާ ގާނޫނުތަކާއި ގަވައިދުތަކެއް އެކުލަވައިލަންވާނީ ދީނީ އިންތަކުގެ ތެރޭގައި ކަމަށް އެމަނިކުފާނު ވިދާޅުވިއެވެ.
ނަމަވެސް، މިފަދަ ހަރުދަނާ ނިޒާމީ އޮނިގަނޑެއް ނެތްކަން ފާހަގަކުރައްވަމުން ރައީސް ވިދާޅުވީ، އެކަން އިސްލާހުކުރެއްވުމަށް ގަސްތުކުރައްވާ ކަމަށެވެ. އެގޮތުން އިސްލާމްދީނާ ފުށުއަރާ އެއްވެސް ގާނޫނެއް އުފަން ނުކުރެވޭނެ ފަދަ ވަރުގަދަ ނިޒާމެއް، އުސޫލީ އަދި ނިޒާމީ ގޮތުން ކަށަވަރުކުރުމަށް މަސައްކަތް ކުރައްވާނެ ކަމުގެ ޔަގީންކަން އެމަނިކުފާނު ދެއްވިއެވެ. މި މަގުސަދު ހާސިލުކުރުމަށްޓަކައި، ބޭނުންވާ ގާނޫނީ އޮނިގަނޑު ރައްޔިތުންގެ މަޖިލީހުގެ މި އަހަރުގެ ތިންވަނަ ދައުރަށް ހުށަހަޅުއްވާނެ ކަމަށް ވެސް ރައީސް އިއުލާނުކުރެއްވިއެވެ.
