ޤައުމީ ދުވަހުގެ މުނާސަބަތުގައި ހއ. އުތީމުގައި ތަރައްޤީކުރި ބޮޑުތަކުރުފާނުގެ ހަނދާނީ ދޮރާށި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ހެނދުނު ރަސްމީކޮށް ހުޅުއްވައިދެއްވައިފިއެވެ.
މި ބިނާއަކީ ޣާޒީ ބަންޑާރައިންގެ އަސަރުތައް ހިމާޔަތްކޮށް ދެމެހެއްޓުމަށް ސަރުކާރުން ފަށްޓަވާފައިވާ މަޝްރޫޢުގެ ތެރެއިން ތަރައްޤީކުރި ތާރީޚީ ބިނާއެކެވެ. މިއަދު ހެނދުނު އުތީމުގައި ބޭއްވި ޚާއްސަ ރަސްމިއްޔާތެއްގައި މި ދޮރާށި ރައީސް ހުޅުއްވައިދެއްވީ މިއަހަރުގެ ޤައުމީ ދުވަހުގެ ހަރަކާތްތަކުގައި ބައިވެރިވެވަޑައިގަތުމަށް އެރަށަށް ކުރައްވަމުން ގެންދަވާ ދަތުރުފުޅުގެ ތެރެއިންނެވެ.
މި ރަސްމިއްޔާތުގައި ޤައުމީ ދުވަހުގެ ހަރަކާތްތަކަށް ދަޢުވަތުއެރުވިގެން ވަޑައިގެންނެވި ޢިއްޒަތްތެރިންނާއި ރަށުގެ ގިނަ އަދަދެއްގެ އާންމުން ބައިވެރިވެވަޑައިގެންނެވިއެވެ. ބިނާ ހުޅުއްވައިދެއްވުމަށްފަހު ރައީސް ވަނީ އެ ބިނާ ބައްލަވާލައްވާފައެވެ.
މި ބިނާ ފަރުމާކޮށްފައިވަނީ ޕޯޗުގީޒުންގެ އަޅުވެތިކަމުން ދިވެހި ޤައުމު ސަލާމަތްކޮށްދެއްވުމަށް ބޮޑުތަކުރުފާނު ކުރެއްވި ތާރީޚީ ޖިހާދު ރަމްޒުކޮށްދޭ ގޮތަށެވެ. މި ބިނާގައި މައިގަނޑު ހަ ތަނބު ހިމެނޭއިރު، ކޮންމެ ތަނބަކުންވެސް ރަމްޒުކޮށްދެނީ ކަޅުއޮއްފުންމީގައި ޖިހާދުކުރެއްވި ހަ ބަޠަލުންނެވެ.
ބިނާގެ މަތީބައިގައި ހަ ފާނޫޒު ހިމަނާފައިވާއިރު، މިއީ މުޅި ޤައުމަށް އުންމީދާއި އަލިކަން ލިބިގެންދިޔުން ރަމްޒުކޮށްދޭ ނިޝާނެކެވެ. އަދި ބިނާގައި 16 ވަނަ ޤަރުނުގެ ފަންނުވެރިކަން ދައްކުވައިދޭ ލިޔެލާޖެހި މަސައްކަތާއި މަރްޙޫމް މުޙައްމަދު ޖަމީލު ދީދީ ލިޔުއްވާފައިވާ ތާރީޚީ ހަނދާން ޅެން ހިމަނާފައިވެއެވެ.
ފަންނާއި ސަގާފަތާއި ތަރިކައާބެހޭ ވުޒާރާއިން ބުނި ގޮތުގައި މި މަޝްރޫޢަކީ ތަރިކައިން އަމްދަނީ ހޯދުމާއި ތާރީޚީ ތަންތަން ރައްކާތެރިކުރުމަށް ސަރުކާރުން ގެންގުޅުއްވާ ތަޞައްވުރެގެ ދަށުން ފެށިގެންދިޔަ މުހިންމު މަސައްކަތެއް ކަމަށެވެ. މިފަދަ ވަސީލަތްތަކުގެ ސަބަބުން ރަށަށް ޒިޔާރަތްކުރާ ފަތުރުވެރިން އިތުރުވެ، ރަށުގެ އިޤްތިޞާދަށާއި ވިޔަފާރިތަކަށް ބޮޑު ކުރިއެރުމެއް ލިބިގެންދާނެ ކަމަށްވެސް އެ ވުޒާރާއިން ބުނެފައިވެއެވެ.
