މި ސަރުކާރުން ކުރިއަށްގެންދާ އެންމެ ބޮޑު މަޝްރޫއުއަކީ މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުޢިއްޒު މި މޭރުމުން ވިދާޅުވީ، ރައީސުލްޖުމްހޫރިއްޔާގެ އޮފީހުން ސިލްސިލާކޮށް ބާއްވަމުން އަންނަ ”ދަ ޕަލްސް“ ޕޮޑްކާސްޓުގައި ސަރުކާރުން ކުރިއަށްގެންދާ މަޝްރޫއުތަކާ ގުޅޭގޮތުން ވާހަކަދައްކަވަމުންނެވެ. އެމަނިކުފާނު ވިދާޅުވީ، ތިލަފުށީ ޕޯޓުގެ މަޝްރޫއަކީ މި ސަރުކާރުން އެންމެ ބޮޑަށް އިސްކަންދޭ މަޝްރޫއު ކަމަށާއި، އެ މަޝްރޫއުގެ ސަބަބުންރާއްޖޭގެ އިގްތިސާދަށް ބޮޑު ކުރިއެރުމެއް ލިބޭނެ ކަމަށެވެ.
”އިރާދަކުރެއްވިއްޔާ ކަމާ ގުޅުންހުރި ހުރިހާ ފަރާތްތަކެއް ގުޅިގެން ވަރަށް ބާރަށް އެ މަސައްކަތް އެބަ ހިނގާ. ސަރުކާރުގެ އަމާޒަކީ، މި އަންނަ އަހަރުގެ ނޮވެންބަރު މަހުގެ 11 އަށް އެތަން ހުޅުވުން.“ – ރައީސް މުޢިއްޒު ވިދާޅުވިއެވެ.
މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަސައްކަތަކީ، ރައީސް މުޢިއްޒުގެ އެންމެ މުހިންމު އެއް ވައުދުފުޅު ކަމަށްވާއިރު މި މަޝްރޫއު ނިމުމުން ވިޔަފާރި ބަނދަރަށް މިހާރު ދިމާވެފައިވާ ޖާގައިގެ ދަތިކަމަށް ދާއިމީ ހައްލެއް ލިބިގެންދާނެ ކަމަށް ވެސް ސަރުކާރުން ވަނީ ބުނެފައެވެ. ތިލަފުށީގައި ތަރައްގީކުރާ ވިޔަފާރި ބަނދަރަކީ ބައިނަލްއަގުވާމީ މިންގަނޑުތަކަށް ފެތޭނޭހެން ތަރައްގީކުރާ ބަނދަރެކެވެ. މިއީ މެދުނުކެނޑި 24 ގަޑިއިރު ހިދުމަތް ދެވޭ ފުރިހަމަ ލޮޖިސްޓިކްސް ނިޒާމެއް ބިނާކުރުމަށް އަޅާ މުހިންމު ފިޔަވަޅެއް ކަމަށް ސަރުކާރުން ބުނެއެވެ.
މި ބަނދަރު ތަރައްގީކުރާނީ އެންމެފަހުގެ ޒަމާނީ ކޮންޓޭނަރ ޓަރމިނަލަކާއި، މަލްޓި-ޕާޕަސް ޓާމިނަލްތަކާއި އެކުގައެވެ. މީގެ އިތުރުން އަވަހަށް ހަލާކުވާ ފަދަ މުދާ ރައްކާކުރާނެ ކޯލްޑް ސްޓޯރޭޖުގެ އިތުރުން ބޮންޑެޑް ވެއަރހައުސްތައް ވެސް މި ބަނދަރުގައި ތަރައްގީކުރުމަށް ވަނީ ހަމަޖެހިފައެވެ.
