ނިމިދިޔަ އެމްޑީޕީގެ ސަރުކާރާ އަޅައިބަލާއިރު މި ސަރުކާރުން ބޭންކުތައް މެދުވެރިކޮށް ދޫކުރި އެމެރިކާ ޑޮލަރުގެ އަދަދު އިތުރުވެފައިވާކަން ހިސާބުތަކުން އެނގޭ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ޑޮލަރު ދޫކުރުމާ ގުޅޭގޮތުން ސަރުކާރުން އަޅަމުން އަންނަ ފިޔަވަޅުތަކާ ގުޅޭގޮތުން އިދިކޮޅު އެމްޑީޕީން އަމާޒުކުރަމުންދާ ފާޑުކިޔުންތަކާ ގުޅިގެން ރައްދުދެއްވުމުގެ ގޮތުން މިނިސްޓަރު ސައީދު އެކްސްގައި ރޭ ހިއްސާކުރެއްވި ޕޯސްޓެއްގައި ބުނީ. އެމްޑީޕީ ސަރުކާރު ނިމުނުއިރު ދޫކޮށްފައިދިޔަ 1.2 ބިލިއަން ޑޮލަރުގެ ބޮޑު ދަރަނި މި ސަރުކާރުން ދައްކައި، ރާއްޖެ އިގުތިސާދީ ގޮތުން އިނދަޖެހުމުން ސަލާމަތްކޮށްދީފައިވާ ކަމަށެވެ.
މިނިސްޓަރު އާންމުކުރެއްވި ތަފާސްހިސާބުތަކަށް ބަލާއިރު، އެމްޑީޕީގެ ވެރިކަމުގައި 2021 ވަނަ އަހަރު މަހަކު އެވްރެޖްކޮށް ދޫކޮށްފައިވަނީ 21.1 މިލިއަން ޑޮލަރެވެ. އަދި 2022 ވަނަ އަހަރު 31.6 މިލިއަން ޑޮލަރު ދޫކުރި އިރު، 2023 ވަނަ އަހަރު ދޫކޮށްފައިވަނީ 36.9 މިލިއަން ޑޮލަރެވެ.
މި ސަރުކާރުގެ ދައުރުގައި 2024 ވަނަ އަހަރު މަހަކު އެވްރެޖްކޮށް 40.5 މިލިއަން ޑޮލަރު ދޫކޮށްފައިވާއިރު މިދިޔަ އަހަރު އަހަރު 61.2 މިލިއަން ޑޮލަރު ދޫކޮށްފައިވެއެވެ. އަދި މިއަހަރުގެ ޖެނުއަރީ މަހުން ޖުލައި މަހުގެ ނިޔަލަށް މަހަކު އެވްރެޖްކޮށް 81.2 މިލިއަން ޑޮލަރު ދޫކޮށްފައިވާކަމަށް ތަފާސްހިސާބުތައް ދައްކައެވެ.
މިނިސްޓަރު ސައީދު އާއްމުކުރެއްވި ތަފާސް ހިސާބުތަކުން ދައްކާގޮތުގައި 2023 ވަނަ އަހަރާ އަޅައިބަލާއިރު މި އަހަރު މަހަކު އެވްރެޖްކޮށް ދޫކުރި ޑޮލަރުގެ މިންވަރު ވަނީ 120 ޕަސަންޓުން އިތުރުވެފައެވެ.
މިނިސްޓަރު ވިދާޅުވީ ރައްޔިތުންގެ ބޭނުންތަކަށް ކުރީ ސަރުކާރަށް ވުރެ ގިނައިން މި ސަރުކާރުން ބޭންކް ރޭޓުގައި ޑޮލަރު ދޫކުރި ކަމަށެވެ.
މިނިސްޓަރު އިތުރަށް ވިދާޅުވީ ރަޢީސް މުޢިއްޒުގެ ވެރިކަމުގައި އެ މަނިކުފާނު އެގެންދަވަނީ، އެމްޑީޕީ މި ގައުމު ވައްޓާލި އިގްތިސޯދީ އަނދަވަޅުން ސަލާމަތް ކުރައްވަމުން ކަމަށެވެ./
