ދިވެހިރާއްޖެ އިސްތިޢުމާރީ ބާރުތަކުގެ ދަށަށް ދާންޖެހުނު ތާރީޚީ ސަބަބުތަކުން ޢިބުރަތް ހާސިލުކޮށް، ”އެންމެ ފުރަތަމަ ޤައުމު“ އިސްކުރުމުގެ ރޫޙު އާލާކުރުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ގޮވާލައްވައިފިއެވެ.
ޤައުމީ ދުވަހުގެ އިރު ފެނުން ތޮޅިލާއިރު، އަޅުގަނޑުމެންގެ ހަނދާންތައް ދަތުރުކުރަނީ މީގެ 467 އަހަރު ކުރީގެ މާޒީއަށް. ކަނޑުގެބާޒުގެ ނަމުން އޭރު މަޝްހޫރުވި ފުރެތިކާލުންގެ އިސްތިޢުމާރީ ކަސްތޮޅުތަކުން ލިބުނު އަނިޔާއިން މި ދީބު މިންޖުކޮށްދެއްވި ހިތްވަރުގަދަ ބަޠަލުންގެ އަގުހުރި ޖިހާދުގެ… pic.twitter.com/lrXCaADE1J
— Dr Mohamed Muizzu (@MMuizzu) August 14, 2026
ފަޚުރުވެރި ޤައުމީ ދުވަހުގެ މުނާސަބަތުގައި ރައީސުލްޖުމްހޫރިއްޔާ ކުރެއްވި ޕޯސްޓުގައި، މީގެ 467 އަހަރު ކުރިން ފުރެތިކާލުންގެ އަޅުވެތިކަމުން މި ދީބު ސަލާމަތްކޮށްދެއްވި ބޮޑުތަކުރުފާނާއި އެމަނިކުފާނުގެ ބައިވެރިންގެ ޖިހާދު ހަނދާންކުރެއްވިއެވެ. ރައީސް ފާހަގަކުރެއްވި ގޮތުގައި، ތާރީޚުގެ ތެރޭގައި އެކި ފަހަރުމަތިން ބޭރުގެ ބާރުތަކުގެ މުށުތެރެއަށް ރާއްޖެ ދާންޖެހުނީ، ޤައުމަށް ހެޔޮ ނޭދޭ އަމިއްލަ އެދުން ބޮޑު ބަޔެއްގެ ޚިޔާނާތުގެ ސަބަބުންނެވެ.
މިއަދުގެ ޒުވާން ޖީލަށް މުޚާޠަބު ކުރައްވައި ރައީސް ވިދާޅުވީ، އެފަދަ ހިތި ތަޖުރިބާތަކެއް އިޢާދަވިޔަ ނުދިނުމަށްޓަކައި ހުރިހާ ދިވެހިން މިއަދު ގަދަ ޢަޒުމެއް ކަނޑައަޅަންޖެހޭ ކަމަށެވެ. އަދި ޤައުމުގެ ސިޔާދަތާއި މިނިވަންކަމަށް ބުރުލެއް އަރައިފާނެ ކޮންމެ ފިތުނަވެރިކަމަކަށް ހުރަސްއަޅާ ބަޔަކަށް ވުމަށް އެމަނިކުފާނު ބާރުއެޅުއްވިއެވެ.
ރައީސުލްޖުމްހޫރިއްޔާގެ މެސެޖު ނިންމަވާލެއްވީ، ރާއްޖޭގެ ކޮންމެ ރައްޔިތެއްގެ ހިތުގައިވެސް ދިވެހި ޤައުމިއްޔަތުގެ ވިންދާއި ރޫޙު ވަރުގަދަކޮށް، ކޮންމެ ކަމެއްގައިވެސް ޤައުމީ މަޞްލަޙަތު ކުރިއަށް ނެރުމަށް ދިވެހި އުޚުއްވަތްތެރި ރައްޔިތުންނަށް އިލްތިމާސްކުރައްވަމުންނެވެ.
ޤައުމީ ދުވަސް ފާހަގަކުރަނީ އައްސުލްޠާން މުޙައްމަދު ތަކުރުފާނުލް އައުޡަމް، ޕޯޗުގީޒުންގެ 15 އަހަރާއި 6 މަސްދުވަހުގެ އަނިޔާވެރި އިސްތިޢުމާރުން ރާއްޖެ މިނިވަންކޮށްދެއްވި ދުވަހުގެ ޒިކުރާ އާކުރުމުގެ ގޮތުންނެވެ.
