އިދިކޮޅު އެމްޑީޕީން ގިނަ ދުވަސްތަކެއް ވަންދެން ތައްޔާރުވަމުންދިޔަ ދަތިވެއްޖެ މުޒާހަރާ މިރޭ ބޭއްވި ނަމަވެސް، އެ މުޒާހަރާއަށް އާންމުންގެ އެއްވެސް ތަރުހީބެއް ނުލިބި ފަނޑުވެގެން ހިނގައްޖެއެވެ.
ސޯޝަލް މީޑިއާގައި އާންމުން ފާޑުކިޔަމުންދާ ގޮތުގައި، ބޮޑު އިޝްތިހާރުތަކަކާއެކު ރޭވި މި މުޒާހަރާގައި 90 މީހުންވެސް ހަމައެއް ނުވެއެވެ.
މިރޭ 8:30 ގައި ފެށުމަށް ތާވަލުކުރި މި މުޒާހަރާ ފެށުނީ 8:55 ހާއިރުއެވެ. މުޒާހަރާގެ އެންމެ ކުރީ ސަފުގައި އެމްޑީޕީގެ އިސް ބޭފުޅުން ކަމަށްވާ ކުރީގެ ރައީސް މުހައްމަދު ނަޝީދާއި، އެ ޕާޓީގެ ޗެއާޕާސަން ފައްޔާޒު އިސްމާއިލް އަދި ކުރީގެ ނައިބު ރައީސް ފައިސަލް ނަސީމް ބައިވެރިވެވަޑައިގެންނެވިއެވެ. ނަމަވެސް ޕާޓީގެ އިސް ލީޑަޝިޕް އެކުގައި މަގުމައްޗަށް ނުކުތްއިރުވެސް، އާންމު ރައްޔިތުންގެ ފަރާތުން ފެނުނީ ފިނި ތަރުހީބެކެވެ.
ކުރިން އެމްޑީޕީން ބާއްވާ ވަރުގަދަ މުޒާހަރާތަކާ އަޅާކިޔާއިރު، މިރޭގެ މުޒާހަރާއިން ފެނިގެންދިޔައީ މުޅިން ތަފާތު މަންޒަރެކެވެ. މާލޭގެ މަގުތައް ފުރާލާ، އެތައް ހާސް ބަޔަކާއެކު މީގެ ކުރިން ބާއްވަމުން އައި ފޯރިގަދަ ހަރަކާތްތަކާ ޚިލާފަށް، މިރޭގެ މުޒާހަރާގައި މީހުން ހިމަނާލެވޭނީ އިނގިލިތަކުން ގުނާލެވޭހާ މަދު އަދަދަކަށެވެ. މިއީ އެމްޑީޕީގެ ތާރީޚުގައި ވެސް އެ ޕާޓީން ބޭއްވި އެންމެ މީހުން މަދު، އަދި ލަދުވެތި އެއް މުޒާހަރާގެ ގޮތުގައި ގިނަ ބަޔަކު ދަނީ ސިފަކުރަމުންނެވެ.
މި މުޒާހަރާގެ ތައްޔާރީތައް ކުރިއަށްދިޔަ ވަގުތު، ކުރީގެ ރައީސް އިބްރާހިމް މުހައްމަދު ސޯލިހު ކުރިއަށް އޮތް ރިޔާސީ ރޭހުގައި ވާދަކުރައްވާނެ ކަމަށް ވިދާޅުވުމާ ގުޅިގެން، އެމްޑީޕީގެ އެތެރޭގައި ވަނީ ބޮޑު ކޯޅުމެއް އުފެދިފައެވެ. މިކަމާ ގުޅިގެން ޕާޓީގެ ތެރޭގައި ބައިބައިވުން އުފެދި، ރައީސް ސޯލިހަށް އަމާޒުކޮށް ބަހުގެ ހަމަލާތައް ދަނީ ރައްދުކުރަމުންނެވެ. ގިނަ ބަޔަކު ގަބޫލުކުރާ ގޮތުގައި މިރޭގެ މުޒާހަރާ ފަނޑުވެގެން ދިޔުމުގެ އެއް ސަބަބަކީ ވެސް ޕާޓީގެ އެތެރޭގައި އުފެދިފައިވާ މި ހަލަބޮލިކަމެވެ.
މިރޭގެ މުޒާހަރާގައި އެމްޑީޕީން ވަނީ ކުރިއަށް އޮތް 10 ދުވަސް ތެރޭގައި ޑޮލަރުގެ އަގު 19 ރުފިޔާއަށް ތިރިކުރުމަށް ސަރުކާރަށް ޑިމާންޑްކޮށްފައެވެ. އާންމުކޮށް އެމްޑީޕީގެ ކޮންމެ މުޒާހަރާއެއްވެސް ސަރުކާރަށް ހުށަހަޅާ ވަރުގަދަ ޑިމާންޑްތަކަކާއެކު ފެށި ނަމަވެސް، މިރޭ ފެނިގެންދިޔައީ އެ ޕާޓީގެ މަގުމަތީގެ ބާރު ކެނޑިފައިވާ މަންޒަރެވެ.
ނަޝީދު މާލޭގައި ހުންނަވާ ނަމަ، ކޮންމެ އަހަރެއްގެ ވެސް އޮގަސްޓް 12 އަދި 13 އާ ދިމާކޮށް މާލެ ތެރެ ހަލަބޮލިކޮށްލުމަށް ކޮންމެވެސް ހަރަކާތެއް ހިންގުމަކީ 2005 ވަނަ އަހަރުން ފެށިގެން އެމަނިކުފާނު ގެންގުޅުއްވާ ސިޔާސީ އާދައެކެވެ. އެހެންނަމަވެސް، ގިނަ ދުވަސްތަކެއް ވަންދެން ރޭވި މިފަހަރުގެ ހަރަކާތުން ފެނިގެންދިޔައީ އެމްޑީޕީގެ ސިޔާސީ ނުފޫޒު ކުޑަވެ، އާންމުންގެ އިތުބާރު ޕާޓީއަށް ގެއްލިފައިވާ މިންވަރު ކަމަށް ގިނަ ބަޔަކު ދަނީ ބުނަމުންނެވެ.
