ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާ ސީދާ ބައްދަލުކޮށް، ރައްޔިތުންގެ ޝުޢޫރުތަކާއި ކަންބޮޑުވުންތައް ހިއްސާކުރުމަށް ހުޅުވާލާފައިވާ ”ރައްޔިތުންގެ އަޑު“ ސިލްސިލާގެ ދަށުން، އިތުރު އަށް ދާއިރާއަކަށް އެ ފުރުސަތު މިއަދު ހުޅުވާލައިފިއެވެ.
މިކަމާ ގުޅިގެން ރައީސުލްޖުމްހޫރިއްޔާގެ އޮފީހުން ބުނެފައިވަނީ، މި ފުރުސަތު މި ފަހަރު ހުޅުވާލާފައިވާ އަށް ދާއިރާއަކީ އިހަވަންދޫ ދާއިރާ، ނައިފަރު ދާއިރާ، ފޮނަދޫ ދާއިރާ، މީދޫ ދާއިރާ، ވިލިމާލެ ދާއިރާ، މައްޗަންގޮޅި ދެކުނު ދާއިރާ، މާމިގިލި ދާއިރާގެ އިތުރުން ތިނަދޫ އުތުރު ދާއިރާގެ ރައްޔިތުންނަށް ކަމަށެވެ.
މި ބައްދަލުވުންތަކުގައި ބައިވެރިވުމަށް އެދޭ ފަރާތްތަކުން، ރައީސުލްޖުމްހޫރިއްޔާގެ އޮފީހުގެ ރަސްމީ ޕޯޓަލް މެދުވެރިކޮށް، މި މަހުގެ 17 ވާ ހޯމަ ދުވަހުގެ ރޭ 12:00 ގެ ކުރިން ރަޖިސްޓްރީވާން ޖެހޭނެއެވެ. ފުރުސަތު ދިނުމުގައި ބަލާނީ، ހުށަހަޅާ ފަރާތްތަކުގެ އަދަދަށާއި، ކަނޑައެޅިފައިވާ ވަގުތުގެ އިތުރުން އިދާރީ އިންތިޒާމުތަކަށް ކަމަށް އެ އޮފީހުން ބަޔާންކުރެއެވެ.
”ރައްޔިތުންގެ އަޑު“ ޕްރޮގްރާމަކީ، ރައްޔިތުންގެ ހުރި ކަންބޮޑުވުންތަކާއި ހުށަހެޅުންތައް އެއްވެސް މެދުވެރިއަކާ ނުލައި ސީދާ ރައީސަށް ހުށަހެޅުމުގެ މަގު ފަހިކޮށްދިނުމަށް ފައްޓަވާފައިވާ މުހިންމު މަސައްކަތެކެވެ.
މިދިޔަ ޖޫން މަހުގެ 25 ވަނަ ދުވަހު ރައީސް ޑރ. މުޙައްމަދު މުޢިއްޒު ވަނީ، ރައްޔިތުންނާ ގާތުން ބައްދަލުކުރައްވައި، އެ ފަރާތްތަކުގެ އަޑު އެއްސެވުމަށްޓަކައި، ވަކިވަކި ދާއިރާތަކަށް ހާއްސަކޮށްގެން ސީދާ އެމަނިކުފާނާ ބައްދަލުކުރެވޭނެ އިންތިޒާމުތަކެއް ވަރަށް އަވަހަށް ހަމަޖައްސަވާނެ ކަމަށް ވިދާޅުވެފައެވެ.
