މާލެ ސިޓީ ކައުންސިލްގެ ރަސްމީ ޖަލްސާއެއްގައި މައްޗަންގޯޅި އުތުރު ދާއިރާގެ ކައުންސިލަރު ޚަދީޖާ މުޙައްމަދު ރައްޔިތުންގެ މަޖިލީހުގެ މެންބަރަކަށް ފުރައްސާރަކޮށްފިއެވެ.
މާލެ ސިޓީ ކައުންސިލްގެ ރަސްމީ ޖަލްސާއެއްގެ ތެރެއިން ޚަދީޖާ ފުރައްސާރަކޮށްފައިވަނީ ރައްޔިތުންގެ މަޖިލީހުގެ މައްޗަންގޯޅި އުތުރު ދާއިރާ ތަމްސީލުކުރައްވާ މެންބަރު އިބްރާހިމް މުޙައްމަދަށެވެ. މި ޖަލްސާގައި ޚަދީޖާ ވަނީ މެންބަރު އިބްރާހިމަށް ނިސްބަތްކޮށް މަލާމާތްކުރުމުގެ އިތުރުން، އޭނާއަށް ވަނަމުން ގޮވައިފައެވެ.
މިކަމާ ގުޅިގެން ގިނަ ބައެއްގެ ފާޑުކިޔުން ޚަދީޖާއަށް ވަނީ އަމާޒުވެފައެވެ.
މިކަން ހިނގައިދިޔައިރު ޖަލްސާގެ ރިޔާސަތުގައި އިންނެވި މާލޭގެ މޭޔަރު އާދަމް އާޒިމްގެ ފަރާތުން ފެނުނު އަމަލުތަކަށް ވެސް ގިނަ ބައެއްގެ ފާޑުކިޔުން ވަނީ އަމާޒުވެފައެވެ. ކައުންސިލަރު ޚަދީޖާގެ މިފަދަ ބޭއަދަބީ އަމަލުތައް ހުއްޓުވުމުގެ ބަދަލުގައި، މޭޔަރު އާޒިމް ވަނީ އެކަމަކީ މަޖާ ކަމަކަށް ހައްދަވައި، އެކަމުގައި ބައިވެރިވެ ހީނ ހައްދަވާފައެވެ.
މިކަމާ ގުޅިގެން މެންބަރު އިބްރާހިމް މުހައްމަދު ވިދާޅުވީ، ރަސްމީ ގަޑީގައި ރައްޔިތުންނަށް ފެންނަ ގޮތަށް، މެންބަރަކަށް ވިޔަސް އަދި އެހެން މީހަކަށް ވިޔަސް ފުރައްސާރަ ކުރުމަކީ އެއްވެސް މޮޅުކަމެއް ނޫން ކަމަށެވެ. އަދި މިކަމުގައި އެންމެ ހަޑިކަމަކީ ރިޔާސަތުގައި އިންނެވި ބޭފުޅާގެ ހާލުދެރަވުން ކަމަށާއި ތައުލީމީ ވިސްނުމުން ނޫންނަމަވެސް ތިމާގެ ހައިސިއްޔަތާ މަގާމުގެ ކަރާމަތަށް ވެސް ވިސްނާލަންވާނެ ކަމަށް މެންބަރު އިބްރާހިމް ވިދާޅުވިއެވެ.
ރަސްމީ ގަޑީގައި رعيةންނަށް ފެންނަގޮތަށް މެންބަރުވިޔަސް އެއްވެސް މީހަކަށް ފުރައްސާރަ ކުރުމަކީ އެއްވެސް މޮޅުކަމެއް ނޫން. މީގައި އެންމެ ހަޑިކަމަކީ رياسةގައި އިންނެވި ބޭފުޅާގެ ހާލުދެރަވުން. تعليمي ވިސްނުމުން ނޫންނަމަވެސް ތިމާގެ ހައިސިއްޔަތާ مقامގެ ކަރާމަތަށްވެސް ވިސް ނާލަންވާނެތާ؟ pic.twitter.com/htQhucMHK6
— Ibrahim Muhammad (@ibrahimjanab) August 12, 2026
ފާހަގަކޮށްލެވޭ ގޮތުގައި، މާލޭ ސިޓީ ކައުންސިލަށް އަލަށް އިންތިހާބުވި ކައުންސިލަތުންގެ ފަރާތުން ބޭއަދަބީ މަންޒަރުތައް ފެންނާތީ އަދި އެކަންކަން އިސްލާހުކުރުމަށް މާލޭ ސިޓީގެ މޭޔަރު އާދަމް އާޒިމް އެއްވެސް މަސައްކަތެއް ނުކުރައްވާތީ ގިނަ ބައެއްގެ ފާޑުކިޔުން ވެސް ވަނީ ކައުންސިލަަށާއި މޭޔަރު އާޒިމަށް އަމާޒުވެފައެވެ.
