ހޮރްމޫޒް ކަނޑުއޮޅި އަލުން ހުޅުވާލުމަށް ކުރެވެމުންދިޔަ މަޝްވަރާތައް ހުއްޓުމަކަށް އައިސް، އެމެރިކާއާއި އީރާނާ ދެމެދު ބަހުގެ ޙަމަލާތައް ވަރުގަދަވެއްޖެއެވެ. އެމެރިކާގެ ރައީސް ޑޮނަލްޑް ޓްރަމްޕް ވަނީ ފާރިސީ ކަނޑުއޮޅީގައި އެމެރިކާގެ ނޭވީން %100 ކޮންޓްރޯލް ހޯދާފައިވާ ކަމަށާއި، އެމެރިކާގެ އަސްކަރީ ބްލޮކޭޑަކީ ”ދަގަނޑު ފާރެއް“ ފަދަ ވަރުގަދަ ބްލޮކޭޑެއް ކަމަށް ބުނެފައެވެ.
އޯވަލް އޮފީހުގައި ވާހަކަދައްކަމުން އަދި ޓްރޫތު ސޯޝަލްގައި ކުރި ޕޯސްޓްތަކެއްގައި ޓްރަމްޕް ވަނީ، އެމެރިކާއިން ދިން ޙަމަލާތަކުގެ ބަދަލު ހޯދުމަށް އީރާނުން ކުރި ޝަރުޠުތައް މުޅިން އިންކާރުކޮށްފައެވެ. އަދި އޭގެ ބަދަލުގައި، ފާއިތުވި 50 އަހަރު ދުވަހުގެ ތެރޭގައި އީރާނުން ހިންގާފައިވާ ކަމަށް ބުނާ ޢުދުވާންތަކާއި، ލިބުނު ގެއްލުންތަކުގެ ބަދަލު އީރާނުން އެމެރިކާއަށް ދޭންޖެހޭނެ ކަމަށް ޓްރަމްޕް ވަނީ ޝަރުޠުކޮށްފައެވެ.
ޓްރަމްޕް ވަނީ އެމެރިކާގެ ޔޫއެސްއެސް ކޯލްއަށް ދިން ޙަމަލާއާއި، ސޫރިޔާ އާއި، ލުބުނާނާއި، ޔަމަން އަދި ޣައްޒާގައި ހިނގި ހަނގުރާމަތަކުގައި އީރާނުގެ ސަބަބުން ލިބުނު ގެއްލުންތަކުގެ ބަދަލު ހޯދުމަށް އެމެރިކާގެ މަންދޫބުންނަށް އަންގާފައެވެ.
އީރާނުގެ އިންފްލޭޝަން %300 އަށް އުފުލި، އިޤްތިޞާދު އިނދަޖެހެމުންދާކަން ފާހަގަކޮށް ޓްރަމްޕް ބުނީ، އީރާނަކީ މިހާރު މުފްލިސްވެފައިވާ ޤައުމެއް ކަމަށާއި، އަސްކަރީ ބްލޮކޭޑް ދެމިއޮންނާނެ ކަމަށެވެ. ދެ ޤައުމުގެ ފަރާތުން ހަރުކަށި ޝަރުޠުތައް ކުރިމަތިކުރުމާ ގުޅިގެން ކަނޑުއޮޅި އަވަހަށް ހުޅުވާލެވޭނެކަމުގެ އުންމީދުތައް ފަނޑުވެ، ދުނިޔޭގެ ބާޒާރުގައި ތެލުގެ އަގު ވަނީ %5 އަށް އުފުލިފައެވެ.
