ރަތްކަނޑާއި އަދަން ކަނޑުއުޅި ގުޅޭ ބާބު އަލް-މަންދަބް ސަރަހައްދުން ދަތުރުކުރި ކާބޯތަކެތި އުފުލާ ”ތިހާމާ“ އުޅަނދަށް ޔަމަނުގެ ހޫޘީން ދިން ”ޑަބަލް-ޓެޕް“ މިސައިލް ހަމަލާތަކެއްގައި މަދުވެގެން 6 މީހުން މަރުވެ 10 މީހުން ޒަޚަމްވެއްޖެއެވެ. މަރުވި 6 މީހުންގެ ތެރޭގައި ހިމެނެނީ އުޅަނދުގެ ފަޅުވެރިންގެ ތެރެއިން ޕާކިސްތާނުގެ 3 މީހުންނާއި އިންޑޮނޭޝިއާގެ މީހެއްގެ އިތުރުން ސަލާމަތްކުރުމުގެ މަސައްކަތުގައި ހަރަކާތްތެރިވި ޔަމަނު ސިފައިންގެ 2 މީހުންނެވެ.
ހޫޘީން ފުރަތަމަ ފޮނުވާލި 3 ބެލިސްޓިކް މިސައިލް އުޅަނދަށް އަމާޒުވެ، އުޅަނދުގައި ވަނީ ބޮޑު އަލިފާންގަނޑެއް ރޯވެފައެވެ. އަދި އުޅަނދުން މީހުން ސަލާމަތްކުރުމަށް ކޯސްޓްގާޑުން ހަރަކާތްތެރިވަމުންދަނިކޮށް، ހޫޘީން ވަނީ ދެވަނަ ފަހަރަށް އެ ސަރަހައްދަށް މިސައިލް ހަމަލާއެއް ދީފައެވެ.
ޔަމަނުގެ ސަރުކާރުން ވަނީ މިއީ ކާބޯތަކެތި އެތެރެކުރުމަށް ހުރަސްއެޅުމަށް ދިން އުއްމީދު ކަނޑުވާލަނިވި ”ޓެރަރިސްޓް“ ހަމަލާއެއްގެ ގޮތުގައި ކުށްވެރިކޮށްފައެވެ.
