2028 ވަނަ އަހަރުގެ ރިޔާސީ އިންތިހާބުގައި ކުރީގެ ރައީސް ޢަބްދުﷲ ޔާމީން ހުންނަވާނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެވަނަ ދައުރަކަށް ހޮވަން ފޫގަޅައިގެން ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި ޕީއެންސީގެ ޕީޖީ ލީޑަރު އިބްރާހީމް ފަލާޙު ވިދާޅުވެއްޖެއެވެ.
ފަލާޙު މި މޭރުމުން ވިދާޅުވީ، ޕީޕަލްސް ނެޝަނަލް ފްރަންޓް (ޕީއެންއެފް) ގެ ޖަލްސާއެއްގައި ކުރީގެ ރައީސް ޔާމީން ދެއްކެވި ވާހަކައަކަށް އިޝާރާތްކުރައްވަމުންނެވެ. ޕީއެންއެފްގެ ޖަލްސާގައި ވާހަކަދައްކަވަމުން ޔާމީން ވިދާޅުވީ، ވެރިކަމަށް ގެނައުމަށްޓަކައި އިދިކޮޅު އެމްޑީޕީގެ މައްޗަށް އަބަދު ވެސް އިހުތިޔާރު ކުރައްވާނީ ރައީސް ޑރ. މުޢިއްޒު ކަމަށެވެ.
”އަދިވެސް އެނީ ޓައިމް އޮފް ދަ ޑޭ، އެނީ ޓައިމް އޮފް ދަ އިޔަރ އަޅުގަނޑު ޗޫސްކުރާނީ މުޢިއްޒު އިނގޭތޯ އެމްޑީޕީގެ މައްޗަށް. އެމްޑީޕީގެ މައްޗަށް އަޅުގަނޑު ޗޫސްކުރާނީ މުޢިއްޒު،“ – ޔާމީން ވިދާޅުވިއެވެ.
ޔާމީން ދެއްކެވި ވާހަކަތަކާ ގުޅިގެން ފަލާޙު ވިދާޅުވީ، 2028 ވަނަ އަހަރުގެ ރިޔާސީ އިންތިހާބުގައި ޔާމީން ހުންނަވާނީ ރައީސް މުޢިއްޒު ދެވަނަ ދައުރަކަށް ހޮވަން ފޫގަޅާލައިގެން ކަމަށާއި އެއީ އެއްވެސް ޝައްކެއް އޮތް ކަމެއް ނޫން ކަމަށެވެ. އަދި އެމްޑީޕީއަށް ވެރިކަން ލިބިއްޖެ ނަމަ ޔާމީން އަނެއްކާވެސް މާފުއްޓަށް ބަދަލުކޮށް އަނިޔާވެރިވާނެކަން ހުދު އެމަނިކުފާނަށް ވެސް ރަނގަޅަށް އެނގިވަޑައިގަންނަވާނެ ކަމަށް ފަލާހް ވިދާޅުވިއެވެ.
2028ގައި ޔާމީނު ހުންނަވާނީ ރައީސް މުޢިއްޒު 2ވަނަ ދައުރަކަށް ހޮވަން ފޫގަޅާލައިގެން މީޝައްކެއް އޮތްކަމެއްނޫން.
ޔާމީނަށްހަމަ ރަނގަޅަށް އިންގިލަށްވާނެ ޒަމާނެއްގެކޮޅުން އެމްޑީޕީއަށް ވެރިކަންލިބުނަސް ޔާމީނު އަނެއްކަ މާފުށްޓަށް ބަދަލުކޮށް އަނިޔާވެރިވާނެ.
ރާއްޖެ އަނެއްކަ… pic.twitter.com/qzxJSs81Qb
— Ibrahim Falah (@IbrahimFalahR) August 10, 2026
ޕީއެންއެފްގެ ޖަލްސާގައި ވާހަކަދައްކަވަމުން ޔާމީން ވަނީ އެމްޑީޕީއަށް ވަރަށް ބޮޑަށް ފާޑު ވިދާޅުވެފައެވެ. ޔާމީން ވިދާޅުވީ، ރައީސް މުޢިއްޒުގެ ސަރުކާރާ އަޅާބަލާއިރު އެމްޑީޕީ ސަރުކާރުގައި ކޮށްފައިވާ ކަންކަން މާ ބޮޑަށް ވެސް ގޯސް ކަމަށާއި، އެމްޑީޕީއަކީ ރައްޔިތުންނަށް ބޮޑެތި އުނދަގޫތަކެއް ކުރިމަތިކުރުވި އަދި އަނިޔާވެރި ބައެއް ކަމަށެވެ.
ޔާމީން އިތުރަށް ވިދާޅުވީ، އެމްޑީޕީއަކީ ޑިމޮކްރަސީގެ ނަމުގައި ހަރަކާތްތެރިވާ ޕާޓީއެއް ނަމަވެސް އެއްވެސް ވަރަކަށް ޑިމޮކްރަސީ ދަންނަ ބައެއް ނޫން ކަމަށާއި، އެމީހުންގެ އަމަލާއި ބަހާ ދިމާނުވާ ކަމަށެވެ.
