ކެންސަރު ބަލީގެ ފަރުވާއަށް ބޭނުންކުރާ ”އޮޕްޑިވޯ“ ބްރޭންޑުގެ އިންޖެކްޝަނެއްގެ ފޭކު ނުވަތަ ނަކަލު ބެޗެއް ރާއްޖެއަށް އެތެރެކޮށްފައިވާތީ، އެ ބޭނުންކުރުމާއި ވިއްކުން މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން މަނާކޮށްފިއެވެ.
އެމްއެފްޑީއޭއިން ނެރުނު ނޫސްބަޔާނެއްގައި ބަޔާންކޮށްފައިވާ ގޮތުގައި، އަސްލު އިންޖެކްޝަނާ އެއްގޮތަށް ނަކަލުކޮށްގެން އުފައްދާފައިވާ މި އިންޖެކްޝަންގެ ބެޗު ނަންބަރަކީ 8081399 ކަމަށެވެ. އަދި މި ބެޗުގެ އިންޖެކްޝަން ރާއްޖެއަށް އެތެރެކޮށްފައިވާކަން ކަށަވަރުކުރެވިފައިވާ ކަމަށްވެސް އެ އިދާރާއިން ވަނީ ހާމަކޮށްފައެވެ.
މަނާކުރެވުނު އިންޖެކްޝަނުގެ ތަފްސީލު:
- ބްރޭންޑް: އޮޕްޑިވޯ
- ޖެނެރިކް ނަން: ނިވޮލުމެބް
- ބާވަތް: އިންޖެކްޝަން (10 mg/mL – 40 mg/4 mL)
- އުފެއްދި ކުންފުނި: ސްވޯޑްސް ލެބޯޓްރީސް އަންލިމިޓެޑު
މި ބެޗުގެ އިންޖެކްޝަން ރާއްޖެއަށް އެތެރެކުރުމާއި، ވިޔަފާރިކުރުމުގެ އިތުރުން އެއްވެސް ބަލިމީހަކަށް ދިނުމަކީ މިހާރު މަނާކަމެކެވެ. މިއީ އާންމު ސިއްހަތަށް އޮތް ބޮޑު ނުރައްކަލަކަށް ވާތީ، ހުރިހާ ސިއްހީ ހިދުމަތްދޭ މަރުކަޒުތަކުންނާއި އާންމު ރައްޔިތުން މިކަމަށް ނުހަނު ސަމާލުވުމަށް އެމްއެފްޑީއޭއިން ވަނީ އިލްތިމާސްކޮށްފައެވެ.
— MFDA (@MFDA_mv) August 12, 2026
މި މައްސަލައާ ގުޅިގެން އިތުރު މައުލޫމާތު ސާފުކުރުމަށް ނުވަތަ މި އިންޖެކްޝަނާ ގުޅޭ އެއްވެސް ކަމެއް ރިޕޯޓުކުރުމަށް ބޭނުންވާނަމަ، އެ އޮތޯރިޓީގެ ހޮޓްލައިން ނަންބަރު 7200321 އަށް ގުޅުމަށް އެ އޮތޯރިޓީން ވަނީ އެދިފައެވެ.
