މި ސަރުކާރުން ޒުވާނުންނަށް މަތީ ތަޢުލީމާއި ހުނަރާއި ވަޒީފާގެ ފުރުޞަތުތައް ފަހިކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ ބައިނަލްއަޤްވާމީ ޒުވާނުންގެ ދުވަހުގެ މުނާސަބަތުގައި ސޯޝަލް މީޑީއާގައި ހިއްސާކުރެއްވި މެސެޖެއްގައެވެ.
އެމަނިކުފާނުގެ މެސެޖުގައި ޒުވާނުންނަކީ ދިވެހިރާއްޖޭގެ އެންމެ ބޮޑު އެއް ބާރުކަން ފާހަގަކުރައްވައި، ޒުވާނުންގެ އުފެއްދުންތެރިކަމާއި އަޒުމަކީ މުޅި ޤައުމަށް ބަދަލުތަކެއް ގެނެސްދޭ ކަމެއް ކަމަށް ވިދާޅުވިއެވެ.
”އަޅުގަނޑުމެންގެ ޒުވާނުންގެ އަތްމަތީގައި، ދިވެހިރާއްޖޭގެ މިއަދާއި މުސްތަޤުބަލު ފާގަތިކަމާއި ވިލުންތެރިކަމާއި އަދި ދެމެހެއްޓެނިވި ތަރައްޤީގެ މައްޗަށް ބިނާވެގެންދާނެކަމާމެދު އަޅުގަނޑަށް ފުރިހަމަ ޔަޤީންކަން އެބައޮތް“ ރައީސް ވިދާޅުވިއެވެ.
ރާއްޖޭގެ އާބާދީގެ ގާތްގަނޑަކަށް 45 ޕަސަންޓަކީ ޒުވާނުން ކަމަށްވާއިރު، އެމީހުންގެ ހުވަފެންތަކަކީ ޤައުމުގެ މުސްތަޤުބަލު ބިނާކުރާނެ މުހިންމު އަސާސެއް ކަމަށް ރައީސް ފާހަގަކުރެއްވިއެވެ. އަދި ނެޝެނަލް އެޕްރެންޓިސްޝިޕް ޕްރޮގްރާމާއި ވަޠަނީ ޚިދުމަތުގެ ޤައުމީ ޕްރޮގްރާމަކީ މި މަގުން ސަރުކާރުން ހިންގާ މުހިންމު މަސައްކަތްތައް ކަމުގައި އެ މަނިކުފާނު ވިދާޅުވިއެވެ.
ޒުވާނުން ބާރުވެރިކުރުމަށްޓަކައި ޒުވާނުންގެ ޤައުމީ ލަފާދޭ ކޮމެޓީއެއް އުފައްދާފައިވާކަން ފާހަގަކުރައްވަމުން، ކްރީއޭޓިވް އިކޮނޮމީއެއް ތަރައްޤީކުރުމުގެ މަސައްކަތްވެސް ކުރިއަށްދާކަމަށް ރައީސް ވިދާޅުވިއެވެ.
މީގެ އިތުރުން މަސައްކަތުގެ މާހައުލަށް ޒުވާނުން ތައްޔާރުކުރުމަށް އަޕް ސްކިލިން ޕްރޮގްރާމުތަކާއި އެޕްރެންޓިސްޝިޕް ޕްރޮގްރާމުތައް ހިންގަމުން އަންނަ ކަމަށްވެސް އެ މަނިކުފާނު ވިދާޅުވިއެވެ.
