ހުޅުމާލެ ތިންވަނަ ފިޔަވަހިން ގޯތި ލިބުނު މީހުންގެ ތެރެއިން މިހާތަނަށް 500 އަށްވުރެ ގިނަ މީހުންނަށް ގޯތި ހަވާލުކޮށްފައިވާ ކަމަށް ހައުސިންގ މިނިސްޓްރީން ހާމަކޮށްފިއެވެ.
ހައުސިންގ މިނިސްޓްރީން މައުލޫމާތު ދީފައިވާ ގޮތުގައި، މިދިޔަ މި މަހުގެ 10 ވަނަ ދުވަހުގެ ނިޔަލަށް 560 ފަރާތަކަށް ވަނީ ގޯތި ހަވާލުކޮށްފައެވެ. މިއީ އެ ސަރަހައްދުން ގޯތި ލިބުނު މީހުންގެ ޖުމުލަ އަދަދަށް ބަލާއިރު ގާތްގަނޑަކަށް 80 އިންސައްތަ މީހުން ކަމަށް އެ މިނިސްޓްރީން ވަނީ ބުނެފައެވެ.
ހުޅުމާލެ ތިންވަނަ ފިޔަވަހީގެ ލޭންޑް ޔޫސް ޕްލޭނަށް ގެނެވުނު ބަދަލުތަކާ ގުޅިގެން، ގޯތި ލިބިފައިވާ 698 ފަރާތެއްގެ ގޯތިތައް ކަނޑައެޅިފައިވާ ސަރަޙައްދަށް ވަނީ ބަދަލުތަކެއް އައިސްފައެވެ. މި ބަދަލާ ގުޅިގެން ލިބޭ ގޯތި އޮންނަ ސަރަޙައްދު ނުވަތަ ޕްލޮޓް ކަނޑައެޅުމަށްޓަކައި ގުރުއަތުލުން ބާއްވާފައިވަނީ މިދިޔަ އަހަރުގެ ޑިސެންބަރު މަހުގެ 20 ވަނަ ދުވަހުއެވެ. އަދި އަމަލީ ގޮތުން ބިން ހަވާލުކުރުމުގެ މަސައްކަތް ރަސްމީކޮށް ފަށާފައިވަނީ މި އަހަރުގެ މާރިޗް މަހުގެ 26 ވަނަ ދުވަހުއެވެ.
ގޯތި ހަވާލުކުރުމުގެ ކަންކަން ކުރިއަށްދާ ގޮތާ ގުޅޭގޮތުން މިނިސްޓްރީން ބުނެފައިވަނީ، ވެރިފަރާތުން ގޯތީގެ ރަޖިސްޓަރީއަށް އެދުމުން، އެ ރަޖިސްޓަރީ ތައްޔާރުކޮށް ހަވާލުކުރާ އުސޫލުން މަސައްކަތް ކުރިއަށްދާ ކަމަށެވެ. އަދި ބާކީ ހުރި ގޯތިތައް ވީހާވެސް އަވަހަކަށް ހަވާލުކޮށް ނިންމުމަށް ގިނަ މަސައްކަތްތަކެއް ކުރަމުންދާ ކަމަށް އެ މިނިސްޓްރީން ބުންޏެވެ.
ހުޅުމާލެ ތިންވަނަ ފިޔަވަހިން ގޯތި ދޫކުރާ އަދަދާއި ގޯތީގެ ބޮޑުމިން:
• 1650 އަކަފޫޓުގެ 181 ގޯތި
• 2050 އަކަފޫޓުގެ 242 ގޯތި
• 2450 އަކަފޫޓުގެ 132 ގޯތި
• 2850 އަކަފޫޓުގެ 62 ގޯތި
• 3250 އަކަފޫޓުގެ 41 ގޯތި
• 3650 އަކަފޫޓުގެ 16 ގޯތި
• 4000 އަކަފޫޓުގެ 24 ގޯތި
ނިމިދިޔަ އެމްޑީޕީ ސަރުކާރުން ހިންގި ”ބިންވެރިޔާ“ ސްކީމްގެ ދަށުން ހުޅުމާލޭ ތިންވަނަ ފިޔަވަހިން ގޯތި ދޫކުރިއިރު، އެ ސަރަޙައްދު އޮތީ ނުހިއްކައެވެ. ނަމަވެސް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ އެ ސަރަހައްދުން 63 ހެކްޓަރުގެ ބިން ހިއްކައި، ގޯތި ހަވާލުކުރުމުގެ މަސައްކަތް ފަށައިފައެވެ.
ހުޅުމާލޭގެ އިތުރުން ގުޅިފަޅުން ގޯތި ލިބުނު ފަރާތްތަކަށް ވެސް ބިން ހަވާލުކުރުމުގެ މަސައްކަތް ހައުސިންގ މިނިސްޓްރީން މިހާރު ދަނީ ކުރަމުންނެވެ. މިއީ މާލޭގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ދާއިމީ ހައްލެއް ހޯދައިދިނުމަށް ސަރުކާރުން ކުރަމުންދާ މަސައްކަތުގެ މުހިންމު މަސައްކަތެއްކަން ފާހަގަކޮށްލެވެއެވެ.
