ގދ. ތިނަދޫގައި އަލުން މީހުން އާބާދުވިތާ 60 އަހަރު ފުރުން ފާހަގަކުރުމަށް ބާއްވާ ކުލަގަދަ ހަރަކާތްތަކުގައި ބައިވެރިވެވަޑައިގަތުމަށް ކުރީގެ ދެ ރައީސުން ކަމަށްވާ މުޙައްމަދު ނަޝީދާއި ޢަބްދުﷲ ޔާމީން ޢަބްދުލްޤައްޔޫމް އެ ސިޓީއަށް ވަޑައިގަތުމަށް ހަމަޖެހިއްޖެއެވެ.
ތިނަދޫ ސިޓީ ކައުންސިލުން ހާމަކޮށްފައިވާ ގޮތުގައި، މި މުނާސަބަތުގައި ބައިވެރިވެވަޑައިގަތުމަށް ކުރީގެ ރައީސް މުޙައްމަދު ނަޝީދާއި ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމަށް ވަނީ ދައުވަތު އަރުވާފައެވެ. އަދި އެ ދެ ބޭފުޅުން ވެސް ވަނީ މި ދައުވަތު ރަސްމީކޮށް ގަބޫލުކުރައްވާފައިވާކަން ކައުންސިލުން ވަނީ ކަށަވަރުކޮށްދީފައެވެ. މި ދަތުރުފުޅުގައި އެ ބޭފުޅުން ތިނަދޫއަށް ވަޑައިގަތުމަށް ހަމަޖެހިފައިވަނީ މި މަހުގެ 21 ވަނަ ދުވަހުއެވެ.
ތިނަދޫގައި އަލުން މީހުން އާބާދުވިތާ 60 އަހަރު ފުރެނީ މި މަހުގެ 22 ވަނަ ދުވަހުއެވެ. މި ތާރީހީ ދުވަސް ފާހަގަކުރުމަށް ”އާބާދީ 60“ ގެ ނަމުގައި ތިން ދުވަހުގެ މުއްދަތަށް ގިނަ ހަރަކާތްތަކެއް ބޭއްވުމަށް ވަނީ ހަމަޖެހިފައެވެ. މީގެ ތެރޭގައި ރަސްމީ ޖަލްސާއެއް ބޭއްވުމާއި، ތިނަދޫގެ ފާހަގަކޮށްލެވޭ ހިދުމަތްތެރިންގެ އަގުވަޒަންކުރުން ހިމެނެއެވެ. މީގެ އިތުރުން ސަގާފީ ހަރަކާތްތަކާއި، ފޮޓޯ މައުރަޒާއި، ފުޅަނދުބުރާއި، ދިދަ ނެގުމުގެ އިތުރުން ގަސް އިންދުމުގެ ހާއްސަ ޕްރޮގްރާމެއް ވެސް ކުރިއަށްދާނެއެވެ.
ކުރީގެ ރައީސް އިބްރާހިމް ނާޞިރުގެ ވެރިކަމުގައި ދެކުނުގެ އަތޮޅުތައް ގުޅިގެން އުފެއްދި ”ޔުނައިޓެޑް ސުވަދީވް ރިޕަބްލިކް“ ގެ ހަރަކާތްތައް ހުއްޓުވުމަށްޓަކައި، ސަރުކާރުން ސިފައިން ފޮނުވައިގެން އެ ރަށުން މީހުން ބާލައި އެ ރަށް ފަޅުކޮށްލީ 4 ފެބްރުއަރީ 1962 ވަނަ ދުވަހުއެވެ. އެއަށްފަހު، އެ ރަށުގައި އަލުން މީހުން އާބާދުވާން ފެށީ 22 އޮގަސްޓް 1966 ވަނަ ދުވަހުން ފެށިގެންނެވެ.
