ތިން މިނިސްޓްރީއެއް ހިންގަމުން ދިޔަ ގްރީން ބިލްޑިންގގައި ހިނގި އަލިފާނުގެ ހާދިސާގެ ތަހުގީގު މިހާރު ނިމިފައިވާ ކަމަށާއި، އެ އިމާރާތުގައި ބަޔަކު ގަސްތުގައި ހުޅުޖެހުމުގެ ހަމަލާއެއް ނުހިމެނޭ ކަމަށް ހޯމް މިނިސްޓަރު ޢަލީ އިޙުސާން ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވައިކަރަދޫ ދާއިރާގެ މެންބަރު ހުސައިން ޒިޔާދު ކުރެއްވި ސުވާލަކަށް ޖަވާބުދެއްވަމުން މިނިސްޓަރު އިޙުސާން ވިދާޅުވީ، ގްރީން ބިލްޑިންގގައި ހިނގި އަލިފާނުގެ ހާދިސާ، ދިވެހި ފުލުހުންނާއި އަވަށްޓެރި ގައުމުތަކުގެ އެހީތެރިކަމާއެކު ތަހުގީގުކޮށް ނިމިފައިވާ ކަމަށެވެ. މި ހާދިސާ ހިނގީ އެއްވެސް ބަޔަކު ގަސްތުގައި އެ އިމާރާތުގައި ހުޅުޖަހައިގެން ނޫންކަން ތަހުގީގުން ހާމަވާ ކަމަށް މިނިސްޓަރު ވަނީ ވިދާޅުވެފައެވެ.
އެ ހާދިސާ ހިނގަން މެދުވެރިވީ ކަރަންޓް ވަޔަރުތަކެއްގައި ރޯވެގެން ކަމަށް ތަހުގީގުން ހާމަވުމުގެ އިތުރުން ހާދިސާ ހިނގި ވަގުތު އެ ސަރަހައްދަށް ދިޔަ ފުލުހުންގެ ބޮޑީކެމްގެ ފުޓޭޖްތަކުން ވެސް އެކަން ސާބިތުވާ ކަމަށް މިނިސްޓަރު ވިދާޅުވިއެވެ.
”ބަޔަކު ގޮސް އަލިފާން ޖަހާފައި އޮތް ހާދިސާއެއް ގޮތަކަށް ނޫން އަޅުގަނޑުމެންނަށް ހާދިސާގެ ތަހުގީގުން މި ފެންނަނީ. ކަރަންޓުގައި ރޯވެފައި، އެންމެ ފުރަތަމަ އިނީޝަލް ސްޓޭޖްގައި ފުލުހުން އެތަނަށް އެޓެންޑްވެގެން ފުލުހުންގެ ބޮޑީކެމްގެ ވީޑިއޯ ފުޓޭޖުން އަޅުގަނޑުމެންނަށް ސާބިތުވޭ އަލިފާން ރޯވެފައި ވަނީ ސީލިންގަނޑު ތެރޭގައި އެއާކޮންޑިޝަނާ ތަކެއްގެ ވައިރުތަކެއްގައިކަން،“- މިނިސްޓަރު އިޙުސާން ވިދާޅުވިއެވެ.
12 ޑިސެމްބަރު 2024 ވަނަ ދުވަހު ހިނގި މި ހާދިސާގައި ގްރީން ބިލްޑިންގގައި ރޯވެ އެ އިމާރާތް ބޭނުންނުކުރެވޭ ވަރަށް ވަނީ ގެއްލުންވެފައެވެ. މިކަމުގެ ސަބަބުން އެ އިމާރާތުގައި ހިންގަމުންދިޔަ މިނިސްޓްރީތައް ވަގުތީގޮތުން މިހާރު ހިންގަމުން އަންނަނީ ދަރުބާރުގޭގައެވެ. މިނިސްޓަރ އިޙުސާން ވިދާޅުވީ މިކަމާ ގުޅޭ މައުލޫމާތު ހިއްސާކުރެއްވުމަށް ވަރަށް އަވަހަށް ނޫސްވެރިންގެ ބައްދަލުވުމެއް ބާއްވާނެ ކަމަށެވެ.
