ރާއްޖެއިން އެތެރެކުރާ ތެލުގެ އަގު ބޮޑުވެގެން ދިޔައިރު 3 ގުނައަށް އަގު އުފުލިގެން ދިޔަ ކަމަށް އެސްޓީއޯގެ މެނޭޖިން ޑިރެކްޓަރ ޝިމާދް އިބްރާހިމް ވިދާޅުވެއްޖެއެވެ.
އިޤްތިޞާދުގެ ދެފަރާތް ނަމުގައި ކުރިއަށްގެންދިޔަ ފޯރަމުގައި ވާހަކަ ދައްކަވަމުން ޝިމާދު ވިދާޅުވީ މުދަލުގެ އަގުތައް އުފުލުމަށް މެދުވެރިވި އެންމެ ބޮޑު ސަބަބަކީ ފްރައިޓުގެ އަގު ނުވަތަ މުދާ އުފުލުމަށް ކުރާ ޚަރަދު އިތުރުވުން ކަމަށެވެ. މިކަން އެ ކުންފުނީގެ ދަށުން ހިންގާ މޯލްޑިވްސް ސްޓޭޓް ޝިޕިންގެ އޮޕަރޭޝަންތަކުން ފެނިގެންދާ ކަމަށް އޭނާ ފާހަގަކުރެއްވިއެވެ.
ރާއްޖެއަށް ބޭނުންވާ ތެޔޮ އެންމެ ގިނައިން އެތެރެކުރަނީ ދައުލަތުގެ ވިޔަފާރި ކުންފުނި އެސްޓީއޯ މެދުވެރިކޮށެވެ. ރާއްޖެއަށް އާންމުކޮށް ތެޔޮ ގެންނަނީ އޮމާނުން ކަމަށްވީ ނަމަވެސް، މެދުއިރުމަތީގެ ހަނގުރާމައާ ގުޅިގެން ފްރައިޓުގެ އަގަށާއި އިންޝުއަރެންސަށް ބޮޑެތި ބަދަލުތަކެއް އައިސްފައިވާ ކަމަށް ޝިމާދު ވިދާޅުވިއެވެ.
އޮމާނުން ރާއްޖެއަށް ތެޔޮ އެތެރެކުރާ ބަނދަރަކީ ސީދާ ހަނގުރާމައިގެ ސަރަހައްދުގައި އޮންނަ ތަނަކަށް ނުވި ނަމަވެސް، އެ ސަރަހައްދުން ތެޔޮ ގެންނަ ނަމަ ވަކި އިންޝުއަރެންސެއް ނަގަން ޖެހޭ ކަމަށް އޭނާ ވިދާޅުވިއެވެ. އެގޮތުން ނަގަންޖެހޭ ވޯ ރިސްކް އިންޝުއަރެންސްގެ ސަބަބުން ޚަރަދުތައް ބޮޑުވެގެންދާ ކަމަށާއި މިފަދަ އެކި ސަބަބުތަކާހުރެ މޭ އަދި ޖޫން މަހު ތެލުގެ އަގު އެންމެ މައްޗަށް ދިޔަ ވަގުތު ތެލުގެ އަގު ތިން ގުނަ އިތުރުވި ކަމަށް އޭނާ ވިދާޅުވިއެވެ.
މިފަދަ ދަތި ހާލަތްތަކުގައި ވެސް ކުންފުންޏަށް ތެލުގެ އަގު މެނޭޖްކުރުމުގައި އެންމެ ބޮޑު ލުޔެއް ލިބިގެންދިޔައީ އަމިއްލަ ދެ ބޯޓުގައި ތެޔޮ ގެނައުމުގެ އިންތިޒާމު ހަމަޖެހިފައިވުމުން ކަމަށް ޝިމާދު ފާހަގަކުރެއްވިއެވެ. އަދި ބޯޓެއް ޗާޓާ ކުރާނަމަ ކުރިން ހޭދަވާ ވަރަށްވުރެ ބޮޑުތަނުން އަގުބޮޑުވެފައިވާ ކަމަށް އޭނާ ވިދާޅުވިއެވެ.
ދުނިޔޭގެ އެކި ކަންކޮޅުތަކަށް ދިމާވި މިފަދަ ދަތިތަކާ ގުޅިގެން އަވަށްޓެރި ބައެއް ޤައުމުތަކުގައި ތެޔޮ ލިމިޓްކޮށްގެން ވިއްކަންޖެހުނު ނަމަވެސް، ސަރުކާރުގެ ސިޔާސަތުތަކުގެ ސަބަބުން ރާއްޖެއަށް އެފަދަ ހާލަތަކާ ކުރިމަތިލާން ނުޖެހޭ ކަމަށް އެސްޓީއޯއިން ބުނެއެވެ.
