ރާއްޖެއާއި އިންޑިއާއާ ދެމެދު މިނިވަން ވިޔަފާރީގެ އެއްބަސްވުން މިއަހަރުގެ ނިޔަލަށް ގާއިމުކުރެވޭނެ ކަމަށް އިކޮނޮމިކް މިނިސްޓަރު މުޙައްމަދު ސަޢީދު ވިދާޅުވެއްޖެއެވެ.
އިކޮނޮމިކް މިނިސްޓްރީން އިސް ނަގައިގެން ޕީއެސްއެމްއާ ގުޅިގެން ބޭއްވި ”އިޤްތިޞާދުގެ ދެފަރާތް“ ފޯރަމްގައި މިނިސްޓަރު ސައީދު ވިދާޅުވީ، މިދިޔަ މާޗު މަހުގެ ތެރޭގައި ރާއްޖެ-އިންޑިއާ އެފްޓީއައިގެ ޓާމްސް އޮފް ރިފަރެންސްގައި ސޮއިކޮށްފައިވާ ކަމަށާއި މި އަހަރުގެ ނިމުމުގެ ކުރިން އެފްޓީއައިގައި ސޮއިކުރެވޭނެ ކަމަށެވެ.
”އަޅުގަނޑުމެން މި ޤަބޫލްކުރަނީ މިއަހަރު ނިމޭއިރު އިންޑިއާއާއެކު މިނިވަން ފިޔަފާރީގެ އެއްބަސްވުމުގެ ތެރެއަށް ވަދެވޭނެކަމަށް. އެހެންވީމައި އިންޓަރގްރޭޑް ވެގެން މާކެޓުތަކުގެ ތެރެއަަށް ދިވެހިން ވެއްދުން، ވައްދާއިރު އެމާކެޓުތައް ދަނޭ، އަޅުގަނޑުމެންގެ މާކެޓައް އެބޭފުޅުން އެދޭ ހުރިހާ ބެނިފިޓެއްގެ ބާރު މިނުގައި އަޅުގަނޑުމެން ދީފިނަމަ ، އަޅުގަނޑުމެންގެ މާކެޓު ހަނިވީމަ. އެއީސަސްޓޭނަބަލް ގޮތެއްގައި ނުވާނެ. އެބެލެންސާއެކު މިގެންދަނީ“ މިނިސްޓަރު ޞައީދު ވިދާޅުވިއެވެ.
އިންޑިއާއާއެކު ކުރިއަށްދާ މި އެއްބަސްވުމުގެ އެންމެ މުހިންމު އެއް ބޭނުމަކީ ދިވެހި ޒުވާނުންގެ އުފެއްދުންތަކަށް އިންޑިއާގެ ބޮޑު މާކެޓުން ފުރުސަތު ހޯދައިދިނުން ކަމަށް މިނިސްޓަރު ވިދާޅުވިއެވެ.
އިންޑިއާއަކީ އައިޓީއާއި މުނިފޫހިފިލުވުމުގެ ދާއިރާއިން ބޮޑު ކުރިއެރުމެއް ހޯދާފައިވާ ޤައުމަކަށްވާއިރު، ސޮފްޓްވެއާއާއި އެޕްލިކޭޝަން އުފައްދާ ދިވެހި ޒުވާނުންނަށް އެ ޤައުމުން ބޮޑެތި ފުރުޞަތުތަކެއް އޮތްކަން އޭނާ ފާހަގަކުރެއްވިއެވެ.
އިންޑިއާ-ރާއްޖެ އެފްޓީއޭގެ މަސައްކަތް ކުރިއަށްދާއިރު، ރާއްޖެއިން ވަނީ ޗައިނާއެކު ސޮއިކޮށްފައިވާ މިނިވަން ވިޔަފާރީގެ އެއްބަސްވުމަށް 2025 ވަނަ އަހަރުގެ ޖަނަވަރީ މަހު ޢަމަލުކުރަން ފަށާފައެވެ.
