ނިމިދިޔަ އެމްޑީޕީ ސަރުކާރުން ސިއްހީ ދާއިރާއާ ގުޅުންހުރި މަޝްރޫއުތައް ހިންގުމަށް ކުރި ހޭދައިން 60 މިލިއަނަށްވުރެ ގިނަ ރުފިޔާ އިސްރާފުވެފައިވާ ކަމަށް ހެތް މިނިސްޓަރު ޤީލާ ޢަލީ ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރުން ކުރެއްވި ސުވާލުތަކަށް ޖަވާބުދެއްވަމުން މިނިސްޓަރު ޤީލާ ވަނީ ރާއްޖޭގެ އެކި ކަންކޮޅުތަކުގައި ސަރުކާރުން މިހާރު ކުރިއަށްގެންދާ ސިއްހީ ދާއިރާގެ މަޝްރޫއުތަކުގެ އެންމެފަހުގެ މައުލޫމާތު ހިއްސާކުރައްވައިފައެވެ. މި މައުލޫމާތުތައް ހިއްސާކުރައްވަމުން މިނިސްޓަރު ވިދާޅުވީ، އެމްޑީޕީ ސަރުކާރުގައި ސިއްހީ ދާއިރާގެ ގިނަ މަޝްރޫއުތަކެއްގެ މަސައްކަތް ފަށައި އެ މަޝްރޫއުތަކުގެ ކޮންޓްރެކްޓަރުންނަށް ފައިސާ ދޫކުރި ކަމަށެވެ. ނަމަވެސް ގިނަ މަޝްރޫއުތަކެއްގެ މަސައްކަތް ނުފެށި ލަސްވުމުގެ ސަބަބުން ބޮޑެތި ގެއްލުންތަކެއް ކުރިމަތިވެފައިވާކަން މިނިސްޓަރު ފާހަގަކުރެއްވިއެވެ.
”ސިއްޙީ ޚިދުމަތުގެ ގިނަ އަދަދެއްގެ ޕްރޮޖެކްޓުތަކެއް ވަނީ ބާތިލުކުރަންޖެހިފައި. 60 މިލިޔަނަށްވުރެ ގިނަ ފައިސާ އިސްރާފުވެފައިވަނީ މިގޮތަށް އެތައް ބަޔަކާ ހަވާލުކުރެވިފައި. އެހެންނަމަވެސް އަޅުގަނޑުމެން މިހާރު މި މަސައްކަތް ކުރަނީ ޤާނޫނީގޮތުން އެ ފައިސާ ހޯދުމަށާއި އަދި ޤާނޫނީގޮތުން ފުރިހަމަކުރަންޖެހޭ ކަންކަން ފުރިހަމަ ކުރުމަށް،“ ސިއްޙަތާއި އާއިލާ އާއި އިޖުތިމާޢީ އެހީއާބެހޭ މިނިސްޓަރ ޤީލާ ވިދާޅުވިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގެންނެވިފަހުން ހުއްޓިފައި ހުރި މަޝްރޫއުތައް ކުރިއަށްގެންދެވޭނެ އިތުރު ގޮތްތައް ހޯއްދަވަމުން ގެންދާކަން ފާހަގަކުރައްވައި މިނިސްޓަރު ވިދާޅުވީ، މަސައްކަތް ނުފެށި ހުރި 16 މަޝްރޫއެއްގެ ކޮންޓްރެކްޓް ބާތިލުކޮށްފައިވާ ކަމަށެވެ. މި މަޝްރޫއުތަކުގެ އެޑްވާންސް ފައިސާގެ ގޮތުގައި 60 މިލިޔަނަށްވުރެ ގިނަ ފައިސާ ދޫކޮށްފައިވާ ކަމަށް މިނިސްޓަރު ވަނީ ވިދާޅުވެފައެވެ.
މިނިސްޓަރު ވިދާޅުވީ، ސަރުކާރުން މިހާރު މަސައްކަތް ކުރަމުންދަނީ ގާނޫނީ ގޮތުން އެ ފައިސާ ހޯދުމުގެ އިތުރުން ގާނޫނީ ގޮތުން ފުރިހަމަކުރަންޖެހޭ ކަންކަން ފުރިހަމަ ކުރުމަށް ކަމަށެވެ. އަދި މި ސަރުކާރުން މަޝްރޫއުތައް ކުރިއަށްގެންދާނީ އެ މަޝްރޫއުތަކަށް ބޭނުންވާ ފައިސާ ހަމަޖެހުމުން ކަމަށް ވެސް މިނިސްޓަރު ވަނީ ވިދާޅުވެފައެވެ.
މިނިސްޓަރު ޤީލާ އިތުރަށް ވިދާޅުވީ، ސިއްހީ ދާއިރާއާ ގުޅުންހުރި އުމްރާނީ ތަރައްގީގެ މަޝްރޫއުތައް ކުރިއަށްދިޔަ ނަމަވެސް، އެ މަޝްރޫއުތައް ކުރިއަށްދާ މުއްދަތުގައި ވެސް ސިއްހީ ހިދުމަތްތަކަށް ބުރޫ ނާރާނޭހެން ރަނގަޅު ސިއްްހީ ހިދުމަތެއް ފޯރުކޮށްދިނުމަށް ކަމަށެވެ.
