ނޫނު އަތޮޅުގެ ފަސް ރަށެއްގައި ސަރުކާރުން އަލަށް ތަރައްޤީކުރި ކުޑަކުދިންގެ ޕާކުތައް ނިންމައި ރަސްމީކޮށް ހުޅުވައިފިއެވެ. މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން، ރަށްރަށުގެ އިޖުތިމާޢީ ދުޅަހެޔޮކަން އިތުރުކުރުމަށާއި ކުޑަކުދިންނަށް ރައްކާތެރި މާޙައުލެއްގައި ކުޅެލާނެ ފުރުޞަތު ހޯދައިދިނުމަށް ސަރުކާރުން ކުރިއަށްގެންދާ ޚާއްޞަ މަސައްކަތްތަކުގެ ބައެކެވެ.
ނ. އަތޮޅުން މި ހަފްތާގައި ޕާކުތައް ހުޅުވި ރަށްތަކުގެ ތެރޭގައި ހިމެނެނީ ކުޑަފަރީ، ހެނބަދޫ، ކެނދިކުޅުދޫ، ވެލިދޫ އަދި މާޅެންދޫއެވެ.
މާޅެންދޫގައި ބޭއްވި ޚާއްޞަ ރަސްމިއްޔާތެއްގައި އެ ރަށުގެ ޕާކު ހުޅުވައިދެއްވީ ފެނަކަ ކޯޕަރޭޝަންގެ މެނޭޖިންގ ޑިރެކްޓަރ މުޙައްމަދު ޢަފީފް ޙުސައިން އާއި، މިނިސްޓްރީ އޮފް ހައުސިންގ، ލޭންޑް އެންޑް އާބަން ޑިވެލޮޕްމަންޓްގެ ސްޓޭޓް މިނިސްޓަރު އަޙްމަދު ސާލިމް އަދި ކެނދިކުޅުދޫ ދާއިރާގެ މެންބަރު މުޙައްމަދު އަފޫ ޙާމިދެވެ. މި ރަސްމިއްޔާތުގައި ރަށު ކައުންސިލާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިތުރުން ގިނަ އަދަދެއްގެ ކުޑަކުދިންނާއި ބެލެނިވެރިން ބައިވެރިވިއެވެ.
މީގެ އިތުރުން ކުޑަފަރީގައި ތަރައްޤީކުރި ޕާކު ހުޅުވައިދެއްވީ ސްޓޭޓް މިނިސްޓަރު އަޙްމަދު ސާލިމް އާއި މެންބަރު މުޙައްމަދު އަފޫ ޙާމިދެވެ. މި ރަށްތަކުގެ ޕާކުތައް ތަރައްޤީކުރުމުގެ މަސައްކަތް ފެނަކަ ކޯޕަރޭޝަނާ ޙަވާލުކޮށްފައިވަނީ މިދިޔަ އަހަރުގެ މާޗް މަހުގެ 29 ވަނަ ދުވަހުއެވެ.
މި މަޝްރޫޢުގެ ދަށުން ޕާކުތަކަށް ބޭނުންވާ ޒަމާނީ ކުޅޭ ސާމާނު ހޯދައި، އެ ތަކެތި ހަރުކުރުމާއި، ޕާކު ސަރަޙައްދު ޒީނަތްތެރިކޮށް އާއިލާތަކަށް ހިތްފަސޭހަ މާޙައުލެއް ވަނީ ޤާއިމުކޮށްފައެވެ. ސަރުކާރުގެ އަމާޒަކީ ރާއްޖޭގެ މީހުން ދިރިއުޅޭ ހުރިހާ ރަށެއްގައި މިފަދަ ޕާކުތައް ޤާއިމުކޮށް، ކުޑަކުދިންގެ ހެދިބޮޑުވުމަށް ބޭނުންވާ ރައްކާތެރި މާޙައުލުތައް ކަށަވަރުކޮށްދިނުމެވެ. އެގޮތުން މިހާރު ކުރިއަށްދާ މިފަދަ އެހެން މަޝްރޫޢުތައް ވެސް މިއަހަރުގެ ނިޔަލަށް ނިންމުމަށް ސަރުކާރުން ދަނީ މަސައްކަތް ކުރަމުންނެވެ.
