ސަޕްލައި ދޯންޏަކުން މީހުން ސަލާމަތްކުރަން އުޅެނިކޮށް ގެއްލުނު މީހުން ހޯދުމަށް، ގާތް ގައުމުތަކުގެ އެހީތެރިކަން ހޯދުމުގެ މަސައްކަތް ކުރަމުން އަންނަ ކަމަށް ފޮރިން މިނިސްޓްރީން ބުނެފިއެވެ.
އެ ހާދިސާއަކީ ފްރެންޑް ފޯ ނަމަކަށް ކިޔާ ސަޕްލައި ދޯންޏެއް މިދިޔަ ބުދަ ދުވަހު ތ. މަޑިފުށިން ފުރައިގެން، ތިލަފުށްޓަށް ގޮސް ހިލަޔާއި ހިލަވެލި ބަރުކޮށްގެން ހުވަދު އަތޮޅަށް ދަތުރުކުރަމުން ދަނިކޮށް ބަންޑުންޖަހާލައި އަޑިއަށްދިޔަ ހާދިސާއެކެވެ.
އެމްއެންޑީއެފުން ބުނި ގޮތުގައި އެ ހާދިސާ ހިނގިއިރު ދޯނީގައި އަށް މީހަކު ތިއްބެވެ. އޭގެ ތެރެއިން ހަތް މީހަކު ވަނީ ސަލާމަތްކޮށްފައެވެ. ނަމަވެސް އެ ހާދިސާގައި އެހީތެރިކަން ފޯރުކޮށްދީ މީހުން ސަލާމަތްކުރުމުގެ މަސައްކަތުގައި ހަރަކާތްތެރިވި ސިފައިންގެ މީހަކާއި ފުލުހެއްގެ އިތުރުން ދޯނީގެ ކައްޕި ވަނީ ގެއްލިފައެވެ. އެއީ އެމްއެންޑީއެފް ފަޔަރ އެންޑް ރެސްކިއު ސާވިސްގެ ސްޓާފް ސާޖަންޓް އިބްރާހީމް މުހައްމަދާއި ފުލުހުންގެ ސާޖަންޓް އަލީ ނާފިއުގެ އިތުރުން ދޯނީގެ ކައްޕި މުހައްމަދު ހަމްދޫނެވެ.
ފޮރިން މިނިސްޓްރީން ބުނީ، ކަމާބެހޭ އިދާރާތަކާ ގުޅިގެން މިވަގުތު އެންމެ އިސްކަމެއްދެނީ ގެއްލުނު މީހުން ވީ އެންމެ އަވަހަކަށް ހޯދުމަށް ކަމަށެވެ. އަދި އެ މީހުން ހޯދުމުގެ އޮޕަރޭޝަނަށް ރާއްޖެއާ ގާތް ގުޅުމެއް އޮންނަ ގައުމުތަކުގެ ފަންނީ އެހީތެރިކަން ހޯދުމަށް މަޝްވަރާކުރަމުން އަންނަ ކަމަށް އެ މިނިސްޓްރީން ބުންޏެވެ.
ލިބެން ހުރި ހުރިހާ ވަސީލަތެއްގެ ބޭނުންކޮށްގެން ގެއްލުނު މީހުން ހޯދުމުގެ މަސައްކަތް މެދުކަނޑާނުލައި ކުރިއަށްދާ ކަމުގެ ޔަގީންކަން ފޮރިން މިނިސްޓްރީން ދީފައިވާއިރު، މި އޮޕަރޭޝަނުގައި ކަނޑާއި ވައިގެ މަގުން ބޮޑު ސަރަހައްދެއް އެމްއެންޑީއެފުން ވަނީ ބަލާފައެވެ. އެގޮތުން ޔޫއޭވީ ޑްރޯންގެ އިތުރުން މޯލްޑިވިއަންގެ ފްލައިޓެއްވެސް މީހުން ހޯދުމުގެ މަސައްކަތުގައި އަންނަނީ ހަރަކާތްތެރިވަމުންނެވެ.
