ސިންގަޕޫރުގެ ގައުމީ ދުވަހާ ގުޅިގެން، އެ ގައުމުގެ ރައީސަށާއި ބޮޑުވަޒީރަށް އަދި ރައްޔިތުންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ތަހުނިޔާއާއި ހެޔޮއެދުންތައް ފޮނުއްވައިފިއެވެ.
ރައީސް އެކްސްގައި މިއަދު ކުރެއްވި ޕޯސްޓެއްގައި ސިންގަޕޫރުގެ ރައީސް ތަރުމަން ޝަންމުގަރަތުނަމް އަދި ބޮޑުވަޒީރު ލޯރެންސް ވޮންގްއަށާއި އެ ގައުމުގެ އެކުވެރި ރައްޔިތުންނަށް ތަހުނިޔާ ފޮނުއްވާފައިވެއެވެ. އަދި ރާއްޖެއާއި ސިންގަޕޫރާ ދެމެދު އޮތް ވަރުގަދަ ރަޙުމަތްތެރި ގުޅުމަކީ، ދެ ގައުމުގެ ދެމެދުގައި އުފެދިފައިވާ އިތުބާރާއި އިހްތިރާމާއި ސަރަޙައްދުގެ ސުލްހަމަސަލަސްކަމާއި ކުރިއެރުމަށް އުންމީދު ކުރާ އެކުވެރި ގުޅުމެއް ކަމުގައި އެ މަނިކުފާނު ވިދާޅުވިއެވެ.
ދެ ގައުމުގެ ގުޅުން އިތުރަށް ބަދަހިވަމުންދާއިރު، މިދިޔަ އަހަރު ރައީސް ވަނީ ސިންގަޕޫރަށް ފުރަމާނަ ދަތުރުފުޅެއް ކުރައްވާފައެވެ.
އެ ގައުމުގެ ރައީސްގެ ދަޢުވަތަކަށް ކުރެއްވި އެ ދަތުރުފުޅުގެ ތެރެއިން ދެ ޤައުމުގެ މެދުގައި މަތީ ފަންތީގެ މަޝްވަރާތައް ބއްވަވައި، ޤާބިލުކަން އިތުރުކުރުމާއި، ތައުލީމީ ދާއިރާއާއި ތިމާވެށީގެ ދާއިރާއިން އެއްބަސްވުންތައް އެކުލަވާލާފައިވެއެވެ.
އެ ދަތުރުފުޅުގެ ހަވާސާގައި ރާއްޖެ-ސިންގަޕޫރު ބިޒްނަސް ފޯރަމެއްވެސް ކުރިއަށް ގެންގޮސްފައިވެއެވެ. ދެ ޤައުމުގެ ދެއެއްހާ ވިޔަފާރިވެރިން ބައިވެރިވި މި ފޯރަމްގައި، ރާއްޖޭގައި ހުރި އިންވެސްޓްމަންޓްގެ ފުރުޞަތުތަކާ ގުޅޭ މަޢުލޫމާތު ވަނީ ހިއްސާކޮށްފައެވެ.
ސިންގަޕޫރުން ގައުމީ ދުވަހުގެ ގޮތުގައި ފާހަގަކުރަނީ އެ ގައުމު މެލޭޝިއާއިން ވަކިވެ މިނިވަންވި ދުވަހެވެ. ދިވެހިރާއްޖެއާއި ސިންގަޕޫރާ ދެމެދު ހާރިޖީ ގުޅުން ގާއިމުކޮށްފައިވަނީ 1975 ވަނަ އަހަރު ފެބުރުވަރީ މަހުގެ 20 ވަނަ ދުވަހުއެވެ.
