މޯލްޑިވްސް އިމިގްރޭޝަނުން މުޅި ރާއްޖެއަށް ދިވެހި ޕާސްޕޯޓުގެ ހިދުމަތް ފުޅާކުރުމުގެ މަޝްރޫއުގެ ދަށުން ގދ. ގައްދޫގައި ރަސްމީކޮށް ޕާސްޕޯޓުގެ ހިދުމަތް ފަށާފައިވާ ކަމަށް އެ އިދާރާއިން ބުނެފިއެވެ.
އިމިގްރޭޝަނުން ބުނީ ގައްދޫގައި މި ހިދުމަތް ފެށުމާއެކު އެ ރަށާއި އެ އަތޮޅުގެ އެހެން ރަށްރަށުގެ ރައްޔިތުންނަށް މާލެ އަށް ނުގޮސް ފަސޭހަކަމާއެކު ޕާސްޕޯޓުގެ ހިދުމަތް ލިބިގެންދާނެ ކަމަށެވެ.
މި ބަދަލާއެކު ގދ. އަތޮޅުން ޕާސްޕޯޓު ނެގުމަށް އެދޭ ފަރާތްތަކަށް އިމުގާ މެދުވެރިކޮށް އޮންލައިންކޮށް ހުށަހަޅާއިރު، ކަލެކްޝަން ޕޮއިންޓެއްގެ ގޮތުގައި ތިނަދޫ ސިޓީގެ އިތުރުން މިހާރު ގައްދޫ ވެސް ހިޔާރުކުރެވޭނެއެވެ.
ރާއްޖޭގެ ހުރިހާ އަތޮޅަކުން އައިޑީކާޑާއި ޕާސްޕޯޓު ޕްރިންޓުކޮށް ދޫކުރުމުގެ ނިޒާމު ގާއިމުކުރުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެންފައިވާ މުހިންމު ވަޢުދުފުޅެކެވެ.
މި ހިދުމަތްތައް އަތޮޅުތަކަށް ފުޅާކުރުމުގެ ސަބަބުން ރައްޔިތުން ދަތުރުފަތުރަށް ކުރަންޖެހޭ ބޮޑު ހަރަދާއި އުފުލަންޖެހޭ ތަކުލީފުތަކަށް ބޮޑު ލުޔެއް ލިބިގެންދާނެ ކަމަށް ސަރުކާރުން ބުނެފައިވެއެވެ.
