ސަޢޫދީ ޢަރަބިއްޔާ، ތުރުކީ އަދި ޕާކިސްތާނުން ގުޅިގެން ތިންފަރާތް އެކުލެވޭ ދިފާޢީ އެއްބަސްވުމެއްގައި (ޓްރައިލެޓެރަލް މިއުޗުއަލް ޑިފެންސް ޕެކްޓު) ޖިއްދާގައި ސޮއިކޮށްފިއެވެ. މި އެއްބަސްވުމުގެ މައިގަނޑު ބޭނުމަކީ ބޯޑަރުތައް ބެލެހެއްޓުމާއި، ޑްރޯން ޙަމަލާތަކުން ދިފާޢުވުމުގެ ނިޒާމުތައް ވަރުގަދަކުރުމާއި، އިޤްތިޞާދީ އަދި އަސްކަރީ އިއްތިހާދެއް ޤާއިމުކުރުމެވެ.
އީރާނުގެ މަޖިލީހުން ވަނީ މި އެއްބަސްވުމަށް ވަރަށް ބޮޑަށް ފާޑުކިޔާފައެވެ. އީރާނުން ބުނީ ”އަންކާރާ އަދި އިސްލާމްއާބާދާއެކު ހަދާ ކަރުދާސް އެއްބަސްވުމަކުން ސަޢޫދީއަށް ރައްކާތެރިކަމެއް ނުލިބޭނެ“ ކަމަށާއި، ބޭރުގެ ބާރުތަކަށް ބަރޯސާވުން ހުއްޓާލުމަށް ސަޢޫދީއަށް އިލްތިމާސްކުރާ ކަމަށެވެ.
މި އެއްބަސްވުން ޤާއިމުކޮށްފައިވަނީ ހޫޘީންގެ ޙަމަލާތައް ސަޢޫދީގެ ބޯޑަރު ކައިރިއަށާއި ރެޑް ސީއަށް އިތުރުވަމުންދާ ދަނޑިވަޅެއްގައެވެ.
