އެމެރިކާއިން އީރާނުގެ ހަކަތައާ ބެހޭ ވަސީލަތްތަކަށް ޙަމަލާދީފިނަމަ، ގަލްފުގެ ޤައުމުތަކުގައި ހުރި ތެޔޮ ވަޅުތަކާއި، ތެޔޮ ސާފުކުރާ ކާރުޚާނާތަކާއި، ކަރަންޓާއި ފެން އުފައްދާ މަރުކަޒުތަކަށް ހަމަލާދޭނެކަމުގެ ވަރުގަދަ އިންޒާރެއް އީރާނުން ދީފިއެވެ. އީރާނުގެ ޚާރިޖީ ވަޒީރު އަައްބާސް އަރާޤްޗީ ވަނީ ސަޢޫދީ ޢަރަބިއްޔާ، ޤަޠަރު އަދި ތުރުކީގެ ޚާރިޖީ ވަޒީރުންނާ ގުޅައި، އެމެރިކާއިން ދޭ ޙަމަލާތައް ހުއްޓުވުމަށް ގަލްފުގެ ޤައުމުތަކުން ޓްރަމްޕަށް ބާރުއެޅުމަށް އެދެފައެވެ.
އީރާނުގެ އިންޒާރާއެކު ސަޢޫދީގެ ވަލީއަހުދު މުޙައްމަދު ބިން ސަލްމާން ވަނީ އެމެރިކާގެ ރައީސް ޑޮނަލްޑް ޓްރަމްޕަށް ގުޅައި، އަސްކަރީ ޙަމަލާތައް ފަސްކޮށް، ސުލްޙައިގެ މަޝްވަރާތަކަށް ފުރުޞަތު ދިނުމަށް އެދިފައެވެ. ސަޢޫދީ ޢަރަބިއްޔާއިން އެމެރިކާއަށް ސުލްޙައަށް އިލްތިމާސްކުރި ނަމަވެސް، ސަޢޫދީގެ ފަސްގަނޑަށް އީރާނުން ޙަމަލާއެއް ދީފިނަމަ ވަގުތުން އަސްކަރީ ރައްދެއް ދޭނެކަމަށް ބުނެފައެވެ.
