ސަޕްލައި ދޯނި ބަންޑުން ޖަހާލި ހާދިސާގައި ގެއްލުނު ސިފައިންގެ މީހަކާއި، ފުލުހަކާއި، ދޯނީގެ ކައްޕި ހޯދުމުގެ މަސައްކަތް އެމްއެންޑީއެފް ކޯސްޓްގާޑާއި ފުލުހުން ގުޅިގެން ހުއްޓުމެއްނެތި ކުރިއަށް އެބަގެންދެއެވެ.
މި ހާދިސާ ހިނގާފައިވަނީ ހިލަ އާއި ހިލަވެލި ބަރުކޮށްގެން ލ. އަތޮޅުން ފުރައިގެން ހުވަދު އަތޮޅަށް ދަތުރުކުރި ”ފްރެންޑް 4“ ނަމަކަށް ކިޔާ ސަޕްލައި ދޯންޏަކަށެވެ. އެމްއެންޑީއެފުން މައުލޫމާތު ދީފައިވާ ގޮތުގައި، މި ދޯންޏަށް ރާޅު އަރައި ދިޔަވެ، އަޑިއަށްދާ ކަމުގެ ރިޕޯޓް ލިބުމާ ގުޅިގެން ކަމާބެހޭ ފަރާތްތަކުން އެހީތެރިކަން ފޯރުކޮށްދެމުން ދަނިކޮށް ދޯނި ވަނީ އެއްކޮށް އަޑިއަށް ގޮސްފައެވެ.
ހާދިސާ ހިނގިއިރު އެ ދޯނީގައި ޖުމްލަ އަށް މީހަކު ތިއްބެވެ. އޭގެ ތެރެއިން ހަތް މީހަކު ވަނީ ސަލާމަތްކުރެވިފައެވެ. ނަމަވެސް، ދޯނި އަޑިއަށް ދިޔަ ވަގުތު ދޯނީގެ ކައްޕީގެ އިތުރުން، އެހީތެރިވުމުގެ މަސައްކަތުގައި އަމަލީ ގޮތުން އުޅުނު ސިފައިންގެ މީހަކާއި ފުލުހަކު ވަނީ ގެއްލިފައެވެ.
ގެއްލުނު ތިން މީހުން ހޯދުމަށްޓަކައި މިހާރު ދަނީ ވަރުގަދަ އޮޕަރޭޝަނެއް ހިންގަމުންނެވެ. އެގޮތުން ސިފައިންގެ އެކި ވަސީލަތްތައް ދަނީ ބޭނުންކުރަމުންނެވެ. އަދި މޯލްޑިވިއަންގެ ފްލައިޓެއް ބޭނުންކޮށްގެން ބޮޑު ސަރަހައްދެއް ބަލަމުންދާއިރު، ކަނޑުމަގުން އެމްއެންޑީއެފް ކޯސްޓްގާޑުގެ އުޅަނދުފަހަރާއި ފުލުހުންގެ އުޅަނދުފަހަރު ދަނީ ހުއްޓުމެއްނެތި އެ ސަރަހައްދުގައި ހަރަކާތްތެރިވަމުންނެވެ.
