ޔޫކްރޭނުގެ އަސްކަރިއްޔާއިން ވަނީ ރަޝިއާގެ އެތެރޭގައިވާ ދެ ތެޔޮ ސާފުކުރާ ކާރުޚާނާއަކަށާއި، ކަޅު ކަނޑުގައި އޮޕަރޭޓްކުރާ ރަޝިއާގެ ބޯޓުފަހަރަށް އަމާޒުކޮށް ކާމިޔާބު ޙަމަލާތަކެއް ދީފައެވެ. ނަމަވެސް، ރަޝިއާއިން ޔޫކްރޭނަށް ދެމުންދާ ވައިގެ ޙަމަލާތައް ދިފާޢުކުރުމަށް ބޭނުންވާ އިންޓަސެޕްޓަރ މިސައިލްތައް ވަރަށް ބޮޑަށް މަދުވެފައިވާކަމުގެ އިންޒާރު ޔޫކްރޭނުގެ ރައީސް ވޮލޮޑިމިއަރ ޒެލެންސްކީ ވަނީ ދެއްވާފައެވެ.
ޔޫކްރޭނުން ފޮނުވާލި ޑްރޯންތަކުން ވަނީ ހަނގުރާމައިގެ ކުރީ ސަފާ 1،300 ކިލޯމީޓަރު ދުރުގައިވާ ބަޝްކޯރތޯސްތާންގެ ބަޝްނެފްޓް-ނޮވޮއިލް ކާރުޚާނާއަށާއި، ޔަރޮސްލާވްލްގައި ހުންނަ ސްލާވްނެފްޓް-ޔާނޯސް ކާރުޚާނާއަށް ޙަމަލާދީފައެވެ. މީގެ އިތުރުން ކަޅު ކަނޑުގައި ދުއްވާ ރަޝިއާގެ އަސްކަރީ ޕެޓްރޯލް ބޯޓުތަކަކަށާއި ސިއްރުން ތެޔޮ އުފުލާ ”ޝެޑޯ ފްލީޓް“ ގެ ޓޭންކަރުތަކަށްވެސް ޔޫކްރޭނުން ވަނީ ޙަމަލާދީފައެވެ.
ރަޝިއާއިން ވަނީ ޔޫކްރޭނުގެ ޚާރކީވްގެ ބަލަކްލިއާ ސަރަޙައްދަށާއި ސުމީއަށް ބެލިސްޓިކް މިސައިލާއި ގައިޑެޑް ބޮން ބޭނުންކޮށްގެން ވަރުގަދަ ޙަމަލާތަކެއް ދީފައެވެ. މި ޙަމަލާތަކުގައި އާންމުންގެ 6 މީހަކު ވަނީ މަރުވެފައެވެ. ޒެލެންސްކީ ބުނީ، 2025 ވަނަ އަހަރާ އަޅާބަލާއިރު 2026 ވަނަ އަހަރުގެ ފުރަތަމަ 6 މަސްދުވަހުގެ ތެރޭގައި ހުޅަނގުން ލިބުނު ވައިގެ ދިފާޢީ މިސައިލްތަކުގެ އަދަދު ތިންބައިކުޅަ އެއްބަޔަށް ދަށްވެފައިވާ ކަމަށެވެ. މީގެ ސަބަބުން، ރަޝިއާއިން އެންމެ ފަހުން ފޮނުވާލި 24 ބެލިސްޓިކް މިސައިލްގެ ތެރެއިން އެންމެ މިސައިލެއްވެސް ޔޫކްރޭނަށް ވައްޓާލެވިފައެއް ނުވެއެވެ.
