އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ) ގެ ޤުދުސް ފޯސްއަށް އެހީތެރިވެދޭ ކަމަށް ތުހުމަތުކޮށް، އެމެރިކާއިން އިރާޤުގެ އަމިއްލަ އެއަރލައިނެއް ކަމަށްވާ ’ފްލައި ބަޣުދާދު‘ އަށް އަޅާފައިވާ ދަތިކުރުމުގެ ފިޔަވަޅުތައް އެމެރިކާގެ ޓްރެޝަރީ ޑިޕާޓްމަންޓުން ރަސްމީކޮށް އުވާލައިފިއެވެ.
މި އެއަރލައިނާއި އެ ކުންފުނީގެ ދެ ބޯއިންގ 737 މަތިންދާބޯޓަށް އެމެރިކާއިން ފިޔަވަޅު އަޅާފައިވަނީ 2024 ވަނަ އަހަރުގެ ޖެނުއަރީ މަހުގައެވެ.
ހޮރްމޫޒް ކަނޑުއޮޅި އަލުން ހުޅުވާލުމަށް އޮމާނުގައި ކުރެވެމުންދާ މަޝްވަރާތަކާ ދިމާކޮށް މި ފިޔަވަޅުތައް އުވާލުމަކީ، އެމެރިކާއިން އީރާނަށް ދިން ”ގުޑްވިލް“ ނުވަތަ ހެޔޮއެދުމުގެ އިޝާރާތެއް ކަމަށް ބައެއް ޑިޕްލޮމެޓުންނާއި މީޑިއާތަކުން ލަފާކުރި ނަމަވެސް، އެމެރިކާއިން ވަނީ މިކަން ދޮގުކޮށްފައެވެ. އެމެރިކާގެ ޓްރެޝަރީގެ އޮފިޝަލަކު ބުނީ، މިއީ އެ އެއަރލައިނުގެ އޮޕަރޭޝަންތަކަށް ގެނައި ހެޔޮ ބަދަލުތަކާ ގުޅިގެން އިދާރީގޮތުން ނިންމި ނިންމުމެއް ކަމަށާއި، މީގެ ސަބަބުން އީރާނާމެދު އެމެރިކާއިން ގެންގުޅޭ ސިޔާސަތަށް އެއްވެސް ބަދަލެއް ނާންނާނެ ކަމަށެވެ.
މި ނިންމުމާއެކު، ފްލައި ބަޣުދާދަށް ބައިނަލްއަޤްވާމީ ބޭންކިންގ ޚިދުމަތްތަކާއި، އިންޝުއަރެންސް އަދި ބޯޓު މަރާމާތުކުރުމުގެ ޚިދުމަތްތައް ހޯދުމަށް ފަސޭހަވެގެންދާނެއެވެ. ނަމަވެސް، ފްލައި ބަޣުދާދުގެ ވެރިޔާ އަދި ޗީފް އެގްޒެކެޓިވް ބަޝީރު ޢަބްދުލްކާޡިމް އަލްވާން އަލް-ޝައްބާނީގެ މައްޗަށް އަޅާފައިވާ ފިޔަވަޅުތައް އަދިވެސް ދެމިއޮންނާނެ ކަމަށް ޓްރެޝަރީ ޑިޕާޓްމަންޓުން ވަނީ ކަނޑައަޅާފައެވެ.
