އއ. އުކުޅަހުގެ ފަރުމަސްވެރިންނަށް ކުރިމަތިވެފައިވާ އައިސް ލިބުމުގެ ދަތިކަމަށް ހައްލެއް ހޯދައިދިނުމުގެ ގޮތުން، އެ ރަށުގައި ޚާއްޞަ އައިސް ޕްލާންޓެއް ބިނާކުރުމުގެ އެއްބަސްވުމުގައި ސަރުކާރުން ސޮއިކޮށްފިއެވެ. މިއީ ރާއްޖޭގައި ފަރުމަސްވެރިކަމަށް އަމާޒުކޮށްގެން ބިނާކުރެވޭ މިފަދަ ފުރަތަމަ އައިސް ޕްލާންޓެވެ.
އުކުޅަހުގައި ރޭ ބޭއްވި ޚާއްޞަ ރަސްމިއްޔާތެއްގައި މި މަޝްރޫއުގެ އެއްބަސްވުމުގައި ސޮއިކުރެއްވީ މަސްވެރިކަމާއި ދަނޑުވެރިކަމާއި ކަނޑުގެ ވަސީލަތްތަކާ ބެހޭ ވުޒާރާގެ ސްޓޭޓް މިނިސްޓަރު މުހައްމަދު މުއްޠަލިބެވެ. މި މަސައްކަތް ސަރުކާރުން ހަވާލުކޮށްފައިވަނީ ޅެހި ކޮންސްޓްރަކްޝަން އެންޑް ޓްރޭޑިން ޕްރައިވެޓް ލިމިޓެޑާއެވެ. މި ރަސްމިއްޔާތު ޝަރަފުވެރިކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒެވެ. އަދި މި ރަސްމިއްޔާތުގައި މަސްވެރިކަމާ ބެހޭ ވަޒީރު އަޙްމަދު ޝިޔާމް ވެސް ބައިވެރިވެވަޑައިގެންނެވިއެވެ.
މި މަޝްރޫއުގެ ދަށުން އުކުޅަހުގައި ބިނާކުރުމަށް ހަމަޖެހިފައިވަނީ 5 ޓަނުގެ އައިސް އުފެއްދުމުގެ ގާބިލުކަން ލިބިގެންވާ ޕްލާންޓެކެވެ. މި މަސައްކަތް ހަވާލުކޮށްފައިވަނީ ފަސް މަސް ދުވަހުގެ ތެރޭގައި ނިންމާލުމަށެވެ.
އުކުޅަހަކީ ފަރުމަސްވެރިކަމުގައި ފާހަގަކޮށްލެވޭ ގިނަ އަދަދެއްގެ މަސްވެރިން އުޅޭ ރަށެކެވެ. މި އައިސް ޕްލާންޓްގެ ސަބަބުން މަސްވެރިން ބާނާ މަސް ތާޒާކަންމަތީ ބެހެއްޓުމަށް ބޭނުންވާ އައިސް ފަސޭހަކަމާއެކު ލިބި، މަސްވެރިންނަށް ކުރިމަތިވަމުންދާ ގޮންޖެހުންތަކަށް ދާއިމީ ހައްލެއް ލިބިގެންދާނެ ކަމަށް ސަރުކާރުން ދެކެއެވެ.
ފަރުމަސްވެރިންނަށް ބޭނުންވާ ތާޒާ އައިސް ފަސޭހައިން ލިބޭނެ ގޮތް ހެދުމަކީ، މަސްވެރިކަމުގެ ސިނާއަތް ކުރިއެރުވުމަށް މި ސަރުކާރުން ދެއްވާ މުހިންމު އަހަންމިއްޔަތެއްގެ ގޮތުގައި މިނިސްޓްރީން ފާހަގަކުރެއެވެ.
