ކުޑަކުދިންގެ ދުވަހުގެ މުނާސަބަތުގައި ހުޅުމާލޭގައި ބާއްވާ ”އުފާ ފެސްޓިވަލު“ ނިންމާލުމުގެ ގޮތުން މިރޭ ހަވާ އަރުވަން ވަނީ ނިންމާފައެވެ.
އެމްއެންޑީއެފް އިން މިއަދު ބުނީ ވިޔަފާރި އުސޫލުން އަމިއްލަ ފަރާތްތަކުން އެދުމުން މިރޭ 10:00 ގައި ހަވާ އަރުވާނެ ކަމަށެވެ. އަދި ހަވާ އަރުވަނީ 3 މިނެޓަށް ކަމަށް ވެސް އެމްއެންޑީއެފްއިން ބުނެއެވެ.
ކުޑަކުދީންގެ ދުވަސް ފާހަގަކުރުމަށް އިޖްތިމާއީ އަދި އާއިލީ ތަރައްގީއާއި ބެހޭ ވުޒާރާއިން އިސްނަގައިގެން ”އުފާ ފެސްޓިވަލް“ ގެ ނަމުގައި ބާއްވާ މި ކާނިވަލް އަކީ ހައުސިން ޑިވޮލޮޕްމެންޓް ކޯޕަރޭޝަން، އެޗްޑީސީ އަދި އުރީދޫ ގުޅިގެން ބާއްވާ ހަރަކާތެކެވެ. ”އުފާ ފެސްޓިވަލް“ އަށް ވަނީ ބޮޑު ތަރުހީބެއް ވެސް ލިބިފައެވެ.
މި ކާނިވަލްގައި ބައިވެރިވާ ކުޑަކުދީންނަށް ގުރުއަތުގައި ބައިވެރިވެ ހާއްސަ އިނާމްތަކެއް ލިބުމުގެ ފުރުސަތު ލިބިގެންދާނެއެވެ. މިރޭ ވެސް 8:00 އިން 10:00 އަށް ކާނިވަލްގެ ހަރަކާތެއްގެ ގޮތުގައި ހާއްސަ މޫވީ ނައިޓެއް ކުރިއަށްދާނެއެވެ.
