އީރާނާއެކު ހިނގަމުންދާ ހަނގުރާމައިގައި ބޭނުންކުރުމުގެ ސަބަބުން އެމެރިކާގެ އަސްކަރިއްޔާއިން ދުރުރާސްތާއަށް ފޮނުވާލާ ’އޭޓީއޭސީއެމްއެސް‘ އަދި ’ޕީއާރުއެސްއެމް‘ މިސައިލްގެ ރިޒާވް ވަރަށް ބޮޑަށް ހުސްވެފައިވާ ކަމަށް ރިޕޯޓްތައް ބުނެފިއެވެ. ފާއިތުވި 5 މަސްދުވަހު އީރާނަށް ދިން ހަމަލާތަކުގައި އެމެރިކާއިން ވަނީ އެމީހުންގެ އަތުގައި ހުރި ގާތްގަނޑަކަށް ހުރިހާ ’ޕްރެސިޝަން‘ މިސައިލެއް ބޭނުންކޮށްފައެވެ. މީގެ އިތުރުން ’ޕެޓްރިއޮޓް‘ ދިފާއީ މިސައިލްގެ 65 އިންސައްތަ ވަނީ ބޭނުންކުރެވިފައެވެ.
އެމެރިކާގެ މިސައިލް ރިޒާވް މަދުވުމުގެ ސަބަބުން ޔޫކްރޭނަށް ދެމުން އައި ’އޭޓީއޭސީއެމްއެސް‘ މިސައިލްތައް ފޯރުކޮށްދިނުން ވަނީ ހުއްޓުމަކަށް އައިސްފައެވެ. ރައީސް ޓްރަމްޕް ވަނީ މިސައިލް ހުސްވާ ކަމަށް ދެކެވޭ ވާހަކަތައް ދޮގުކޮށް، އެމެރިކާގެ ދިފާއީ ކުންފުނިތަކުން ރެކޯޑު އަދަދަކަށް މިސައިލާއި ވަޒަން އުފައްދަމުންދާ ކަމަށް ބުނެފައެވެ.
