އިސްތިއުމާރަށް ލެޖިޓިމެސީ ދީ، އިޒްރޭލުގެ އަނިޔާވެރި ޖަރީމާތައް ދޮވެދީ ފަލަސްޠީނުގެ ޖިހާދު ފުނޑުފުނޑުކޮށްލަން އެމެރިކާ އިސްވެ ހަދާފައިވާ ’ބޯޑް އޮފް ޕީސް‘ މެދުވެރިވެ ޣައްޒާގައި ގާއިމްކޮށްފައި ’ވަގުތީ ސުލްޙަ‘ އޮތްތާ އޮއްވާ، އެޔަށް އެއްވެސް ފަރުވާލެއް ނުބަހައްޓަާ އިޒްރޭލުން ކެނޑިނޭޅި ޣައްޒާ އަށް ދެމުންދާ ޙަމަލާތަކުގެ ތެރެއިން، ނިމިދިޔަ ހަފްތާ ބަންދުގައި އިޒްރޭލުން ދިން ހަމަލާތަކެއްގައި 25 އަށްވުރެ ގިނަ ފަލަސްތީނު މީހުން މަރުވެފައިވާ ކަމަށް އދ. ގެ އޯސީއެޗްއޭ އިން ހާމަކޮށްފިއެވެ.
’ބޯޑް އޮފް ޕީސް’އިން ހުށަހެޅި ދެވަނަ މަރުހަލާގެ ރޯޑްމެޕަށް ޙަމާސްއިން ވަނީ އެއްބަސްވެފައެވެ. މި ރޯޑްމެޕްގައިވަނީ ހަތިޔާރު ބެހެއްޓުމަށާއި، ބައިނަލްއަޤްވާމީ ލަޝްކަރުތައް ހަރަކާތްތެރިވުމާއެކު، އިޒްރޭލު ސިފައިން ފިޔަވަހިތަކަކަށް ބެހިގެން ޣައްޒާއިން ފޭބުމަށެވެ.
އިޒްރޭލުގެ އިސްތިއުމާރީ ވެރިކަމުން ވަނީ ’ސެކިއުރިޓީ‘ ކަންބޮޑުވުންތަކެއް ހުރިކަން ފާހަގަކޮށް، ޙަމާސްގެ ހަތިޔާރުތައް އެއްކޮސް ނުބަހައްޓަނީސް، ނިރުބަވެރި އިޒްރޭލު ސިފައިން ޣައްޒާއިން ނުބާލާނެ ކަމަށް ބުނެފައެވެ. ސުލްޙައިގެ އެއްބަސްވުން އޮތް ނަމަވެސް، އިޒްރޭލުން ދިން ނިރުބަވެރި ހަމަލާތަކުގައި ހަފްތާ ބަންދުގައި އެކަނިވެސް 25 އަށްވުރެ ގިނަ ފަލަސްތީނު މީހުން ވަނީ ޝަހީދުވެފައެވެ.
