އއ. އުކުޅަހުގެ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލައަށް ހައްލެއް ހޯދުމުގެ ގޮތުން އެރަށުގައި ތަރައްޤީކުރާ 50 ހައުސިންގ ޔުނިޓްގެ އަމަލީ މަސައްކަތް ރަސްމީކޮށް ފަށައިފިއެވެ.
މި މަޝްރޫޢުގެ ބިންގާ އެޅުމަށް އުކުޅަހުގައި ބޭއްވި ޚާއްސަ ރަސްމިއްޔާތެއްގައި ބިންގާ އަޅުއްވައިދެއްވީ ބިނާރާއި ގެދޮރުވެރިކަމާ އުމްރާނީ ތަރައްޤީއާއި ބެހޭ ވަޒީރު ޑރ. ޢަބްދުﷲ މުއްޠަލިބެވެ. މި ރަސްމިއްޔާތުގައި މި މަސައްކަތް ހަވާލުކޮށްފައިވާ އަލްޓެކް މޯލްޑިވްސް ޕްރައިވެޓް ލިމިޓެޑްގެ ފަރާތުން އެ ކުންފުނީގެ މެނޭޖަރ އިބްރާހިމް އަޒީމް ބައިވެރިވެވަޑައިގެންނެވިއެވެ. މީގެ އިތުރުން ރަށު ކައުންސިލާއި، މުއައްސަސާތަކުގެ އިސްވެރިންނާއި ރަށުގެ ގިނަ އަދަދެއްގެ ރައްޔިތުން މި ރަސްމިއްޔާތުގައި ބައިވެރިވިއެވެ.
މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އުކުޅަހަށް ކުރެއްވި ދަތުރުފުޅުގެ ތެރެއިން ފެށިގެންދިޔަ މުހިންމު މަސައްކަތެކެވެ. އުކުޅަހުގެ ހިއްކި ސަރަޙައްދުގައި ބިނާކުރާ މި 50 ހައުސިންގ ޔުނިޓަކީ 3 ކޮޓަރީގެ އެޕާޓްމަންޓްތަކެކެވެ. މިދިޔަ އަހަރުގެ ނޮވެމްބަރު މަހުގެ 6 ވަނަ ދުވަހު އަލްޓެކް މޯލްޑިވްސްއާ ހަވާލުކުރި މި މަޝްރޫޢު އެއް އަހަރާއި ހަތް މަސްދުވަހުގެ ތެރޭގައި ނިންމުމަށް ވަނީ ތާވަލުކޮށްފައެވެ.
އުކުޅަހުގެ ބޯހިޔާވަހިކަމާ ގުޅޭގޮތުން ރައީސުލްޖުމްހޫރިއްޔާ ޑރ. މުޢިއްޒު މީގެ ކުރިން ވިދާޅުވެފައިވަނީ، ހިއްކި ސަރަޙައްދުން 50 ހައުސިންގ ޔުނިޓުގެ އިތުރުން 250 ގޯތިވެސް ދޫކުރުމަށް ނިންމަވާފައިވާ ކަމަށެވެ. ގާތްގަނޑަކަށް 1200 މީހުންގެ އާބާދީއެއް އޮންނަ އުކުޅަހުގައި 2023 ވަނަ އަހަރު ވަނީ 13 ހެކްޓަރުގެ ބިން ހިއްކާފައެވެ.
ބޯހިޔާވަހިކަމުގެ މަޝްރޫޢުގެ އިތުރުން އުކުޅަހުގެ ތަރައްޤީއަށްޓަކައި އިތުރު މަސައްކަތްތަކެއްވެސް ދަނީ ކުރެވެމުންނެވެ. އެގޮތުން މަސްވެރިންނަށް ފަސޭހަކޮށްދިނުމަށްޓަކައި އެރަށުގައި 5 ޓަނުގެ އައިސްޕްލާންޓެއް ބެހެއްޓުމުގެ މަސައްކަތް ޅެހި ކޮންސްޓްރަކްޝަން އެންޑް ޓްރޭޑިންގއާ ވަނީ ހަވާލުކޮށްފައެވެ. މި މަޝްރޫޢުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ މަސްވެރިކަމާ ކަނޑުގެ ވަސީލަތްތަކާ ބެހޭ ވުޒާރާގެ ސްޓޭޓް މިނިސްޓަރ މުޙައްމަދު މުއްޠަލިބެވެ.
