ދިވެހިރާއްޖޭގެ ކަނޑުތަކާއި ފަރުތަކާއި މަސްވެރިކަމަކީ ހަމައެކަނި ގުދުރަތީ ހަޒާނާތަކެއް ނޫން ކަމަށާއި، އެއީ ޤައުމީ އިޤްތިޞާދުގެ މައިގަނޑު ތަނބުތައް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ އއ. އުކުޅަހުގައި ބޭއްވި ”ސިޑްސް-އެސްއޭއައި“ (SIDS-SAI) ސިމްޕޯޒިއަމް ނިންމުމުގެ ރަސްމިއްޔާތާއި ”އައިޑީއައި ގްލޯބަލް ސަމިޓް“ ފެށުމަށް ބޭއްވި ޚާއްޞަ ބައްދަލުވުމުގައި ވާހަކަފުޅު ދައްކަވަމުންނެވެ.
”އަޅުގަނޑުމެންގެ ފާގަތިކަމުގެ ބިންގަލަކީ ތިމާވެށި ރައްކާތެރިކުރުން. ކަނޑުތަކާއި، ފަރުތަކާއި، މަސްވެރިކަމާއި، ކަނޑުގެ ދިރުންތަކަކީ ހަމައެކަނި ގުދުރަތީ ރީތިކަމެއް ނޫން، އެއީ އަޅުގަނޑުމެންގެ އިޤްތިޞާދުގެ ތަނބުތައް،“ ރައީސް ވިދާޅުވިއެވެ.
ރައީސްގެ ވާހަކަފުޅުގައި، ދިވެހިރާއްޖެ ފަދަ ޖަޒީރާ ޤައުމަކަށް ތިމާވެށި ހިމާޔަތްކުރުމަކީ އިޤްތިޞާދީ ތަރައްޤީއާ ވަކިކުރެވޭނެ ކަމެއް ނޫންކަން ފާހަގަކުރެއްވިއެވެ.
ޤައުމީ މި ރައުސްމާލު ރައްކާތެރިކުރުމަށްޓަކައި ހަމައެކަނި ތިމާވެށީގެ ވަޢުދުތަކެއްވުމުން ނުފުދޭނެކަން ފާހަގަކުރައްވައި، ރައީސް ވިދާޅުވީ އެކަމަށްޓަކައި ހަރުދަނާ ވެރިކަމުގެ ނިޒާމަކާއި، ނަތީޖާ ނެރެވޭފަދަ ގޮތަކަށް ސިޔާސަތުތައް ތަންފީޒުކުރުމާއި، އާންމުންގެ ފާރަވެރިކަން ބޭނުންވާނެ ކަމަށެވެ. އަދި ދެމެހެއްޓެނިވި ތަރައްޤީއަކީ ދާއިމީ ފާގަތިކަމަކަށް ބަދަލުވާނީ މި ހުރިހާ ކަމެއް އެކުލެވިގެން މަސައްކަތް ކުރުމުން ކަމަށް އެމަނިކުފާނު ވިދާޅުވިއެވެ.
ތަރައްޤީވަމުން އަންނަ ކުދި ޖަޒީރާ ދައުލަތްތަކަށް (ސިޑްސް) ކުރިމަތިވެފައިވާ ގޮންޖެހުންތަކަށް އަލިއަޅުއްވާލައްވަމުން ރައީސް ވިދާޅުވީ، އެއްވެސް ޤައުމަކަށް އެކަނި މި ގޮންޖެހުންތަކާ ކުރިމަތިނުލެވޭނެ ކަމަށެވެ. ނަމަވެސް، އެންމެން ގުޅިގެން މަސައްކަތްކޮށްފިނަމަ، ވަކިވަކި ޤައުމުތަކުގެ ޤާބިލުކަމަށްވުރެ މާ ވަރުގަދަ ބާރެއް އުފެއްދިދާނެ ކަމަށް ވިދާޅުވިއެވެ.
އުކުޅަހުގައި ބޭއްވުނު މި ސިމްޕޯޒިއަމްއިން އުފެދުނު ގުޅުންތެރިކަމުގެ ރޫޙު، ކުރިއަށް އޮތް ގްލޯބަލް ސަމިޓްގައިވެސް ދެމިއޮންނާނެ ކަމަށް އުންމީދު ކުރައްވާ ކަމަށް ވިދާޅުވަމުން ރައީސް ވަނީ ބައިނަލްއަޤްވާމީ މައިދާނުގައި ކުދި ޖަޒީރާ ޤައުމުތަކުން އެކަތިގަނޑަކަށް ވުމަށް ގޮވާލައްވާފައެވެ.
