ތަކެތީގެ އަގު އުފުލެމުން ދާ ކަމަށް ބުނެ އިދިކޮޅު އެމްޑީޕީ އަންނަ ހަފުތާގައި މުޒާހަރާއަށް ނުކުންނަން ތައްޔާރުވަމުންދާއިރު އެ ޕާޓީން ފާޅުކުރަމުން އަންނަ ކަންބޮޑުވުންތަކަށް އިކޮނޮމިކް މިނިސްޓަރު މުހައްމަދު ސައީދު، ވިޔަފާރިވެރިންގެ ބަހާއެކު ރޭ ވަރުގަދަ ރައްދެއް ދެއްވައިފިއެވެ.
އިކޮނޮމިކް މިނިސްޓަރު މުހައްމަދު ސައީދު ރޭ އެކްސްގައި ހިއްސާކުރެއްވި ވީޑިއޯ މެސެޖެއްގައި ވިދާޅުވީ، ސިޔާސީ މަގުސަދުތަކެއް ހާސިލްކުރުމަށްޓަކައި ގައުމުގެ އިގްތިސާދީ އިތުބާރު ނަގާލުމަށް އިދިކޮޅު އެމްޑީޕީގެ އިސް ފަރާތްތަކުން މަސައްކަތްކުރަމުން އަންނަ ކަމަށެވެ.
މިނިސްޓަރު ވިދާޅުވީ ކުރީގެ ސަރުކާރުން ގިނަ އަދަދަކަށް ފައިސާ ޗާޕުކޮށް ބާޒާރަށް ނެރުމުގެ ސަބަބުން ދިމާވި އިގްތިސާދީ ދަތިތައް ފޫބެއްދުމަށް މި ސަރުކާރުން މިހާރު މަސައްކަތް ކުރަމުން އަންނަ ކަމަށާއި، މިހާރު ފެންނަމުން މިދާ އިގްތިސާދީ ހާލަތަކީ އެ ކުރީގެ ސިޔާސަތުތަކުގެ ނަތީޖާ ކަމަށެވެ.
”ސިޔާސީ މަގުސަދެއް ހާސިލްކުރުމަށްޓަކައި، ރާއްޖޭގެ ވިޔަފާރިތަކަށް ޓާގެޓްކޮށް، ގައުމީ އިގްތިސާދުގެ އިތުބާރު ނަގާލަން އެމްޑީޕީގެ އިސްފަރާތްތަކުން، ހާއްސަކޮށް ރާއްޖޭގައި ކުރީން ވެރިކަންކޮށްފައިވާ ބައެއް ފަރާތްތަކުން ކުރާ މަސައްކަތް ހުއްޓާލަންޖެހޭ. އެމްޑީޕީއަށް ލިބުނު ފުރުސަތުގައި މިއިން ކަމެއް ރަނގަޅުކުރަން ކުރި އެންމެ ކަމެއްވެސް ދައްކަވާ! ނެތް. ފައިސާ ޗާޕްކުރީ ވަކި ސުމާރެއް ބަލާނުލާ. ގޯހުގެ ފެށުމަކީ އެއީ. އެކަން ފޫބައްދަން މަސައްކަތް ފަށާ، ދިވެހި ރައްޔިތުންގެ ބޮލުގައި އެޅިފައި އޮތް ބޮޑު ދަރަނިން ބައެއް ދައްކާ، ގައުމަށް ހަމަޖެހުން ގެންނަމުން ދަނިކޮށް އަނެއްކާ ތިޔަ ހައްދަވަނީ އަނެއް ގޯސް.“ އެ ވީޑިއޯއާއެކު މިނިސްޓަރު ސައީދު އެކްސްގައި ލިޔުއްްވާފައިވެއެވެ.
މި މައްސަލައިގައި ވިޔަފާރިވެރިންގެ ފަރާތުން ހިޔާލު ފާޅުކުރައްވަމުން ލިލީ އެންޓަޕްރައިސަސްގެ މެނޭޖިން ޑިރެކްޓަރު އަހުމަދު ނާސިރު ވިދާޅުވީ، ތަކެތީގެ އަގުތައް އުފުލެނީ ސަރުކާރުގެ ސިޔާސަތުތަކުން ނޫން ކަމަށާއި އެއީ މައިގަނޑު ގޮތެއްގައި ބައިނަލްއަގުވާމީ ފެންވަރުގައި ހިނގަމުންދާ ހަނގުރާމަތަކާއި ތެލުގެ އަގަށް އަންނަ ބަދަލުތަކުގެ ސަބަބުން މުދާ އުފުލުމުގެ ހަރަދުތައް ބޮޑުވުމުން ދިމާވާ ކަމެއް ކަމަށެވެ.
މި ހަގީގަތްތައް ހާމަކުރައްވަމުން އެމްއެޗްއޭ ޕްރައިވެޓް ލިމިޓެޑްގެ ފަރާތުން ވެސް ވަނީ ބައެއް ބާވަތްތަކުގެ އަގުތައް ހިފެހެއްޓުމަށް ކުންފުނިތަކުން ކުރަމުން އަންނަ މަސައްކަތްތަކަށް އަލިއަޅުވާލައިފައެވެ.
ސަރުކާރުން ކުރަމުން އަންނަ މަސައްކަތްތަކުގެ ތެރެއިން 1.2 ބިލިއަން ރުފިޔާގެ ދަރަނި ދައްކައި، ޑޮލަރު ލިބޭ މިންވަރު އިތުރުކުރުމަށްޓަކައި ފޮރިން އެކްސްޗޭންޖް ގާނޫނަށް އިސްލާހު ގެނެސްފައިވާކަން މިނިސްޓަރު ފާހަގަކުރެއްވިއެވެ. މި ހާލަތުން އަރައިގަތުމަށް ރައީސް ޑރ. މުހައްމަދު މުއިއްޒު ވަރަށް ބޮޑެތި މަސައްކަތްތަކެއް ކުރައްވަމުން ގެންދަވާކަންވެސް މިނިސްޓަރު ފާހަގަކުރެއްވިއެވެ.
