އެމެރިކާއާއެކު ސީދާ ސުލްހައިގެ މަޝްވަރާތަކެއް ކުރިއަށްދާ ކަމަށް ބުނާ ބުނުން އީރާނުގެ މަޖިލީހުގެ ރައީސް މުހައްމަދު ބާޤިރު ގާލީބާފް އަދި ޚާރިޖިއްޔާއިން އަލުން ދޮގުކޮށްފިއެވެ. މަޖިލީހުގެ ރައީސް ގާލީބާފް ބުނީ އެމެރިކާގެ މަޖުބޫރުކުރުންތަކަށާއި ބިރުދެއްކުންތަކަށް އީރާނުން އަމާން ނުދޭނެ ކަމަށެވެ. އަދި މަޝްވަރާތައް ކުރިއަށްދަނީ އޮމާން މެދުވެރިކޮށް އެކަނި ކަމަށް އޭނާ ބުންޏެވެ.
އީރާނުގެ އަސްކަރިއްޔާ އޮތީ ސުލްހައިގެ މަޝްވަރާތަކާއެކުވެސް، ކޮންމެ ވަގުތަކުވެސް ހަމަލާދޭން ތައްޔާރަށް ކަމަށާއި، ދިފާއީ ބާރު ވަރުގަދަކޮށްފައިވާ ކަމަށް އީރާނުން ބުނެއެވެ. އީރާނުން ބުނެފައިވަނީ އެމެރިކާއިން އީރާނުގެ ބަނދަރުތަކަށް އަޅާފައިވާ ކަނޑުގެ ބްލޮކޭޑް އުވާނުލަނީސް ހޮރްމޫޒް ކަނޑުއޮޅީގެ ޙާލަތު އާންމު ޙާލަތަކަށް ނުގެނެވޭނެ ކަމަށެވެ.
