މޯލްޑިވްސް ކަސްޓަމްސް ސަރވިސްގެ ޤާނޫނީ ޒިންމާ އަދާކުރުމާ ގުޅޭގޮތުން ސޯޝަލް މީޑިއާގައި ދައުރުވަމުންދާ ވާހަކަތަކާ ގުޅިގެން، އެ މުއައްސަސާއިން ނޫސް ބަޔާނެއް ނެރެ ކަންބޮޑުވުން ފާޅުކޮށްފިއެވެ.
ކަސްޓަމްސްއިން ނެރުނު މި ބަޔާނުގައި ބުނެފައިވަނީ، ދިވެހިރާއްޖެއަށް އިމްޕޯޓްކުރާ މުދަލާއި، ފަސިންޖަރުންނާއި، ރާއްޖެއިން ބޭރުން އަންނަ އުޅަނދުފަހަރު ބަލައި ފާސްކުރުމަކީ ދިވެހިރާއްޖޭގެ ކަސްޓަމްސްގެ ޤާނޫނު (ނަންބަރު 8/2011) ގެ ދަށުން އެ ސަރވިސްއާ މަތިކުރެވިފައިވާ ލާޒިމު ޒިންމާއެއް ކަމަށެވެ.
މި ޒިންމާ އަދާކުރުމުގެ ގޮތުން، ރާއްޖޭގެ ބަނދަރުތަކުގައި ޤާއިމުކޮށްފައިވާ ވަސީލަތްތައް ބޭނުންކޮށްގެން މުދަލާއި ފަސިންޖަރުން އަދި އުޅަނދުފަހަރު ބަލައި ފާސްކުރަމުންދާ ކަމަށް ކަސްޓަމްސްއިން ހާމަކުރެއެވެ. އަދި ކަސްޓަމްސްއަށް ލިބޭ މައުލޫމާތާއި އެހެނިހެން ހޯދުންތަކަށް ރިޢާޔަތްކޮށް، މުދަލެއް ނުވަތަ ފަސިންޖަރެއް ފިޒިކަލީ ބަލައި ފާސްކުރަން ޖެހިއްޖެ ހާލަތެއްގައި، ޤާނޫނާއި ޤަވާޢިދާ އެއްގޮތްވާ ގޮތުގެ މަތިން އެކަން ކުރަމުންދާނެ ކަމުގެ ޔަގީންކަންވެސް އެ މުއައްސަސާއިން ވަނީ ދީފައެވެ.
ކަސްޓަމްސްއިން އިތުރަށް ބުނެފައިވަނީ، ބޯޑަރުގައި މިފަދަ ފިޔަވަޅުތައް އަޅަމުންދަނީ ރާއްޖެއަށް އެތެރެކުރުން މަނާ ތަކެތި ހިފެހެއްޓުމަށާއި، ދިވެހި ރައްޔިތުންނާއި މުޖުތަމަޢުގެ ސަލާމަތާއި ރައްކާތެރިކަން ކަށަވަރުކުރުމުގެ މަތިވެރި މަޤްޞަދުގައި ކަމަށެވެ. އެހެންކަމުން، މި މަސައްކަތްތައް ކުރިއަށްދަނީ ކަނޑައެޅިފައިވާ އުޞޫލުތަކުގެ ތެރެއިން ކަމަށްވެސް ބަޔާނުގައިވެއެވެ.
މި ބަޔާން ނިންމާލަމުން ކަސްޓަމްސްއިން ވަނީ، އެ މުއައްސަސާގެ ޤާނޫނީ މަސްޢޫލިއްޔަތާއި ޒިންމާ އަދާކުރުމަށް ކުރެވޭ މަސައްކަތްތަކާމެދު ރައްޔިތުންގެ މެދުގައި ޝައްކު އުފައްދައި، ނުރަނގަޅު ތަޞައްވުރެއް އުފެދޭ ގޮތަށް އެއްވެސް ފަރާތަކުން ޢަމަލުނުކުރުމަށް އިލްތިމާސްކޮށްފައެވެ.
