މިނިސްޓްރީ އޮފް ހެލްތު، ފެމިލީ އެންޑް ވެލްފެއާ އިން ނުކުޅެދުންތެރިކަން ހުންނަ ފަރާތްތަކާއި އެ ދާއިރާގައި މަސައްކަތްކުރާ ފަރާތްތަކުގެ އަގުވަޒަންކުރުމަށް ދޭ ”ރިވެލި އެވޯޑު 2026“ އަށް ކުރިމަތިލުމުގެ ފުރުސަތު ހުޅުވާލައިފިއެވެ.
އެވޯޑަށް އެދި ހުށަހެޅުމުގެ އެންމެ ފަހު ތާރީހާކީ 30 އޯގަސްޓް 2026 ވާ އާދީއްތަ ދުވަހުގެ 13:00 އެވެ.
ނުކުޅެދުންތެރިކަން ހުންނަ ފަރާތްތަކަށް ހިތްވަރު ދިނުމާއި އެފަރާތްތަކުގެ ލާބައަށް މަސައްކަތްކުރާ ފަރާތްތަކުގެ ހިދުމަތުގެ އަގު ވަޒަންކުރުމުގެ ގޮތުން ދެވޭ މި އެވޯޑަށް ހަ ދާއިރާއަކުން ކުރިމަތިލެވޭނެއެވެ. އޭގެ ތެރޭގައި ނުކުޅެދުންތެރިކަން ހުންނަ މީހުންނާއި ރާއްޖެއަށް ރީތި ނަން ހޯދައިދޭ ނުކުޅެދުންތެރިކަން ހުންނަ ފަރާތްތަކާއި ތައުލީމީ ދާއިރާގައި މަސައްކަތްކުރާ ފަރާތްތަކާއި ޖަމުއިއްޔާތަކާއި ފަންނީ އެހީތެރިކަން ފޯރުކޮށްދޭ ފަރާތްތަކުގެ އިތުރުން އިގްތިސޯދީ ގޮތުން ބާރުވެރިކުރުމަށް މަސައްކަތްކުރާ ފަރާތްތައް ހިމެނެއެވެ.
މި އެވޯޑަށް އަމިއްލައަށް ނަން ހުށަހެޅުމުގެ އިތުރުން، އެހެން ފަރާތަކުން ނޮމިނޭޓް ކުރުމުގެ ފުރުސަތު ވެސް ވަނީ ފަހިކޮށްދީފައެވެ.
މި އެވޯޑަށް އެދި ހުށަހަޅާ ފަރާތްތަކުން ފުރިހަމަކޮށްފައިވާ އެޕްލިކޭޝަން ފޯމާއި އެޕްލިކޭޝަނުގައި ބަޔާންކުރާ ކަންތައްތަކުގެ ސައްހަކަން އަންގައިދޭ ލިޔުންތަކާއި ވަނަވަރާއި އައިޑީ ކާޑުގެ ކޮޕީއެއް ހުށަހަޅަންޖެހޭނެއެވެ.
މީގެ އިތުރުން ނޮމިނޭޓް ކުރާނަމަ އެ ފަރާތުގެ ސިޓީއަކާއި ކަމާ ގުޅޭ ދާއިރާއިން ކޮށްފައިވާ މަސައްކަތްތައް ހެކިކޮށްދޭ ދެ ފަރާތެއްގެ ލިޔުން ވެސް ހުށަހަޅަންވާނެއެވެ. އެވޯޑު ދެވޭ ފަރާތްތައް ކަނޑައަޅާނީ މިނިސްޓްރީން އެކުލަވާލާ ހާއްސަ ކޮމިޓީއަކުންނެވެ.
އެވޯޑަށް އެދި ހުށަހަޅާ ފޯމާއި އުސޫލުތައް ހެލްތު ނިސްޓްރީގެ ވެބްސައިޓް health.gov.mv އިންނާއި އުމަރު ޒާހިރު އޮފީސް ބިލްޑިން އިންނާއި، އަތޮޅުތަކުގައި ގާއިމްކޮށްފައިވާ ފެމިލީ އެންޑް ޗިލްޑްރަން ސާވިސް ސެންޓަރުތަކުން ލިބެން ހުންނާނެއެވެ.
ފުރިހަމަ ކުރެވިފައިވާ ލިޔުންތައް 30 އޯގަސްޓް 2026 ވާ އާދީއްތަ ދުވަހުގެ 13:00 ގެ ކުރިން ހެލްތު މިނިސްޓްރީގެ ކައުންޓަރަށް ނުވަތަ އީމެއިލް disability@health.gov.mv މެދުވެރިކޮށް ހުށަހަޅަން ޖެހެއެވެ.
