ޕަބްލިކް ސެކްޓާ އިންވެސްޓްމަންޓް ޕްރޮގްރާމްގެ ދަށުން ދ. ކުޑަހުވަދޫގައި ތަރައްޤީކުރާ އާ ހޮސްޕިޓަލުގެ އަމަލީ މަސައްކަތަށް ބޭނުންވާ ފުރަތަމަ ޝިޕްމަންޓްގެ ސާމާނު އެރަށަށް ގެންގޮސް، އެ ތަކެތި އަންލޯޑްކުރުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން، އާރުޑީސީން ފަށައިފިއެވެ.
މި ޝިޕްމަންޓުގައި ހިމެނެނީ ހޮސްޕިޓަލު އިމާރާތް ކުރުމުގެ ފުރަތަމަ މަރުހަލާގައި ބޭނުންކުރާ އަސާސީ ސާމާނުތަކާއި މަސައްކަތްކުރާ މީހުން ތިބުމަށް ހަދާ ލޭބާ އެކޮމޮޑޭޝަން ބްލޮކް އިމާރާތް ކުރުމަށް ބޭނުންވާ މުހިންމު ވަސީލަތްތަކެވެ.
ސަރުކާރުން ކުރިއަށްގެންދާ މި މަޝްރޫއަކީ ކުޑަހުވަދޫގެ ސިއްހީ ޚިދުމަތްތައް ފުޅާކޮށް، ރައްޔިތުންނަށް ފެންވަރު ރަނގަޅު ސިއްހީ ފަރުވާ ފަސޭހައިން ލިބޭނެ މަގުފަހިކުރުމުގެ ގޮތުން ފަށާފައިވާ މުހިންމު މަސައްކަތެކެވެ.
ރޯޑް ޑިވެލޮޕްމަންޓް ކޯޕަރޭޝަނުން މައުލޫމާތު ދޭ ގޮތުގައި، މި ސާމާނުތައް ބޭލުމަށްފަހު، އެކޮމޮޑޭޝަން ބްލޮކްގެ މަސައްކަތް ވަރަށް އަވަހަށް ފެށިގެންދާނެއެވެ. މިއާއެކު، ހޮސްޕިޓަލުގެ މައިގަނޑު އޮނިގަނޑު އެޅުމުގެ މަސައްކަތްތައް ވެސް ޝެޑިއުލާ އެއްގޮތަށް ކުރިއަށް ގެންދިއުމަށް އަންނަނީ މަސައްކަތް ކުރަމުންނެވެ.
މި މަޝްރޫއަކީ ސަރުކާރުގެ ތަރައްޤީގެ ޕްލޭނުގެ ދަށުން ރާއްޖޭގެ އެކި ސަރަހައްދުތަކުގައި ސިއްހީ ނިޒާމު ހަރުދަނާކުރުމަށް ކުރަމުންދާ މަސައްކަތްތަކުގެ ތެރޭގައި ހިމެނޭ މުހިންމު މަޝްރޫއެކެވެ.
