އެމެރިކާއާއެކު ސުލްޙައިގެ އެއްބަސްވުމަކަށް އައުމަށް އީރާނަށް ލިބޭނެ ”އެންމެ ފަހުގެ ފުރުޞަތަކީ“ މިހާރު ކުރިއަށްދާ މަޝްވަރާތައް ކަމަށް ބުނެ އެމެރިކާގެ ރައީސް ޑޮނަލްޑް ޓްރަމްޕު ވަރުގަދަ އިންޒާރެއް ދީފިއެވެ. ރައީސް ޓްރަމްޕު ބުނީ އީރާނުގެ ބަނދަރުތައް އެމެރިކާގެ ކަނޑުގެ ސިފައިން ވަނީ ”ދަގަނޑު ފާރެއްހެން“ ބަންދުކޮށްފައެވެ. އަދި ސުލްޙައިގެ އެއްބަސްވުމަކަށް ނާދެވިއްޖެނަމަ، ”ދެވަނަ ބޮޑު ހަނގުރާމައަށްފަހު ބަޔަކަށް ދޭނެ އެންމެ ވަރުގަދަ ޙަމަލާ“ އެމެރިކާއިން އީރާނަށް ދޭނެ ކަމަށް ބުނެފައެވެ.
އީރާނުގެ ޚާރިޖިއްޔާއިން ވަނީ އެމެރިކާއާއެކު ސީދާ މަޝްވަރާތަކެއް ކުރަމުންދާ ކަމަށް ބުނާ ބުނުން ދޮގުކޮށްފައެވެ. އީރާނުން ބުނީ މަޝްވަރާތައް ކުރިއަށްދަނީ އޮމާން މެދުވެރިކޮށް، ކަނޑުއޮޅިން ދަތުރުކުރެވޭނެ ވަގުތީ މަގެއް ހޯދުމަށް އެކަނި ކަމަށެވެ. އެމެރިކާގެ ކަނޑުގެ ބްލޮކޭޑުން ސަލާމަތްވުމަށްޓަކައި އީރާނުގެ ޓްރޭޑް މިނިސްޓަރު މުހައްމަދު އަލީ އަތާބަކް ވަނީ ޕާކިސްތާނަށް ދަތުރުކޮށް އެއްގަމު މަގުންނާއި ޕާކިސްތާނުގެ ބަނދަރުތައް ބޭނުންކޮށްގެން ވިޔަފާރި ކުރެވޭނެ ގޮތްތަކާ މެދު މަޝްވަރާ ކޮށްފައެވެ.
