ކ. ގާފަރު ކައިރިއަށް ކޮޅުވެއްޓިއެއް ބަންޑުން ޖަހާލި ހާދިސާގައި ގެއްލުނު ދެ ބިދޭސީން ހޯދުމަށްޓަކައި، ކަނޑާއި ވައިގެ މަގުން މިހާތަނަށް 3580 އަކަ ކިލޯމީޓަރުގެ ސަރަޙައްދެއް ބަލާފައިވާ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ހާމަކޮށްފިއެވެ.
މިދިޔަ ހުކުރު ދުވަހު ހިނގި މި ހާދިސާގައި ބަންޑުން ޖަހާލާފައިވަނީ ”ލިއޯ ޕާލް“ ނަމަކަށް ކިޔާ ކޮޅުވެއްޓިއެކެވެ. މި ހާދިސާ ހިނގި އިރު އޭގައި ތިބި މީހުންގެ ތެރެއިން 2 ބިދޭސީއަކު ވަނީ ކަނޑަށް ގެއްލިފައެވެ. އެމްއެންޑީއެފުން ވިދާޅުވި ގޮތުގައި، އެ މީހުން ހޯދުމުގެ މަސައްކަތް ހާދިސާ ހިނގި ވަގުތުން ފެށިގެން މެދުކެނޑުމެއްނެތި ދަނީ ކުރަމުންނެވެ.
އެމްއެންޑީއެފްގެ ކޯސްޓްގާޑުން ކުރިއަށްގެންދާ މި އޮޕަރޭޝަނުގެ ތަފްސީލްތަކަށް ހާމަކޮށްފައިވާއިރު، ކޯސްޓްގާޑް ޝިޕް ’ޢިމާދުއްދީން‘ އާއި ފާސްޓް އިންޓަސެޕްޓަރ ކްރާފްޓް ބޭނުންކޮށްގެން ކަނޑުގެ 441 އަކަ ނޯޓިކަލް މޭލުގެ ސަރަޙައްދެއް މިހާތަނަށް ބަލާފައިވާ ކަމަށްވެއެވެ. މީގެ އިތުރުން، ކޯސްޓްގާޑުގެ ހުނަރުވެރި ޑައިވަރުން ވަނީ ކަނޑުގެ އަޑިން 675,120 އަކަ މީޓަރުގެ ސަރަޙައްދެއް ބަލައި ފާސްކޮށްފައެވެ.
މި ހާދިސާގައި ގެއްލުނު ދެ މީހުން ހޯދުމަށް ވައިގެ މަގުންވެސް ޚާއްޞަ މަސައްކަތްތަކެއް ދަނީ ކުރެވެމުންނެވެ. އެމްއެންޑީއެފުން ވަނީ އެ ސަރަޙައްދުން ދަތުރުކުރާ އުޅަނދުފަހަރުތަކުންނާއި، ކައިރި ރަށްތަކުން މިކަމަށް ޚާއްޞަ ސަމާލުކަމެއް ދިނުމަށް އިލްތިމާސްކޮށްފައެވެ.
ގެއްލިފައިވާ ދެ މީހުންނާ ބެހޭ އެއްވެސް މައުލޫމާތެއް ލިބިއްޖެނަމަ، ލަސްނުކޮށް އެމްއެންޑީއެފް ކޯސްޓްގާޑުގެ ހިލޭ ގުޅޭ ނަންބަރު 191 ނުވަތަ 3395981 އަދި 3398898 އަށް ގުޅުއްވައި އެ މައުލޫމާތު ހިއްސާކޮށްދެއްވުމަށް އެމްއެންޑީއެފުން އެދިވަޑައިގަންނަވައެވެ.
