ހޮރްމޫޒް ކަނޑުއޮޅީގެ މައްސަލައިގައި ކުރިއަށްދާ މަޝްވަރާތައް އަވަސްކޮށް، އަންގާރަ ދުވަހުގެ ނިޔަލަށް އެ ކަނޑުއޮޅި އާންމު ވިޔަފާރި އުޅަނދުފަހަރަށް ”މުޅިން ހުޅުވާލަންޖެހޭނެ“ ކަމަށް އެމެރިކާގެ ރައީސް ޑޮނަލްޑް ޓްރަމްޕް ބުނެފިއެވެ. ރައީސް ޓްރަމްޕް ސޯޝަލް މީޑިއާގައި ކުރި ޕޯސްޓެއްގައި ބުނެފައިވަނީ އެމެރިކާގެ ކަނޑުގެ ސިފައިންގެ ފުރިހަމަ ކޮންޓްރޯލް ހޮރްމޫޒް ކަނޑުއޮޅިއަށް އެބައޮތް ކަމަށާއި، މާދަމާވެސް އެތަން ހުޅުވާލެވިދާނެ ކަމަށެވެ.
އީރާނުން ކަނޑުއޮޅިން ދަތުރުކުރާ އުޅަނދުފަހަރުތައް އަތުން ”ޓްރާންސިޓް ފީ“ ނުވަތަ ޓެކްސް ނެގުމަށް ހުށަހެޅި ހުށަހެޅުން އެމެރިކާއިން ވަނީ މުޅިން ދެކޮޅުހަދާފައެވެ. އީރާނުގެ ޚާރިޖިއްޔާއިން ވަނީ އެމެރިކާއާއެކު ސީދާ މަޝްވަރާތަކެއް ކުރަމުންދާ ކަމަށް ބުނާ ބުނުން ދޮގުކޮށްފައެވެ. އީރާނުން ބުނީ މަޝްވަރާތައް ކުރިއަށްދަނީ އޮމާން މެދުވެރިކޮށް އެކަނި ކަމަށެވެ. އީރާނުން މިކަން ދޮގުކުރުމާ ގުޅިގެން ޓްރަމްޕު ވަނީ އީރާނުގެ ވެރިންނަކީ ”އޮޅުވާލާ“ ބައެއްގެ ގޮތުގައި ސިފަކޮށް، އެމެރިކާގެ ބްލޮކޭޑް ކުރިއަށްދާނެ ކަމަށް ބުނެފައެވެ.
