އީރާނަށް ދޭން ނިންމާފައިވާ ”ވަރުގަދަ“ އަސްކަރީ ހަމަލާތައް އެމެރިކާގެ ރައީސް ޑޮނަލްޑް ޓްރަމްޕް މަޑުޖައްސާލައިފިއެވެ. މި ނިންމުމާއެކު ދުނިޔޭގެ ބާޒާރުގައި ތެލުގެ އަގު ވަނީ ފީފާއަކުން 4 ޑޮލަރަށްވުރެ ބޮޑުތަނުން ދަށްވެފައެވެ.
ރައީސް ޓްރަމްޕް ބުނީ ޙަމަލާތައް މަޑުޖައްސާލީ ސުލްޙައިގެ އެއްބަސްވުމަކަށް އައުމަށާއި، ހޮރްމޫޒް ކަނޑުއޮޅި އަލުން ހުޅުވާލުމުގެ މަގުފަހިކުރުމަށް އީރާނާއި ސަރަހައްދީ ގައުމުތަކުން އެދުމުން ކަމަށެވެ. އީރާނުގެ ޚާރިޖިއްޔާއިން ވަނީ އެމެރިކާއާއެކު ސީދާ މަޝްވަރާތަކެއް ކުރަމުންދާ ކަމަށް ބުނާ ބުނުން ދޮގުކޮށްފައެވެ. އީރާނުން ބުނީ މަޝްވަރާތައް ކުރިއަށްދަނީ އޮމާން މެދުވެރިކޮށް، ކަނޑުއޮޅިން ދަތުރުކުރެވޭނެ ވަގުތީ މަގެއް ހޯދުމަށް އެކަނި ކަމަށެވެ.
އީރާނުގެ ދޮގުކުރުމާ ގުޅިގެން ޓްރަމްޕް ވަނީ އީރާނުގެ ވެރިންނަކީ ”އޮޅުވާލާ“ ބައެއްގެ ގޮތުގައި ސިފަކޮށް، އެމެރިކާގެ ކަނޑުގެ ބްލޮކޭޑް ކުރިއަށްދާނެ ކަމަށް ބުނެފައެވެ.
