ބެލްޖިއަމަށާއި ވިލާތުގެ އިއްތިހާދު (އީޔޫ)އަށް ރާއްޖޭން ކަނޑައަޅުއްވާ ސަފީރުކަމަށް ކުރީގެ ބަންޑާރަނައިބު ފާޠިމަތު ދިޔާނާ ސަޢީދު މިއަދު އައްޔަންކުރައްވައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދިޔާނާއަށް އެ މަޤާމުގެ ފަތްކޮޅު އެރުއްވީ މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ރަސްމިއްޔާތެއްގައެވެ.
މި މަޤާމަށް ދިޔާނާ އައްޔަންކުރެއްވުމަށް ރައީސުލްޖުމްހޫރިއްޔާ ނަންފުޅު ހުށަހެޅުއްވީ މިދިޔަ ޖުލައި މަހުގެ 6 ވަނަ ދުވަހުއެވެ. އެ ނަންފުޅު ދިރާސާކުރުމަށްފަހު ރައްޔިތުންގެ މަޖިލީހުން އެކަމަނާއަށް ރުހުން ދީފައިވަނީ ޖުލައި މަހުގެ 29 ވަނަ ދުވަހުއެވެ.
ދިޔާނާ ސަޢީދަކީ ދައުލަތުގެ އިސް މަޤާމުތަކެއް ފުރުއްވާފައިވާ ބޭފުޅެކެވެ. އެގޮތުން ކުރީގެ ރައީސް މުޙައްމަދު ނަޝީދުގެ ސަރުކާރުގައި ބަންޑާރަނައިބުކަން ކުރެއްވުމުގެ އިތުރުން، ކުރީގެ ރައީސް ޑރ. މުޙައްމަދު ވަޙީދު ޙަސަން މަނިކުގެ ސަރުކާރުގައި ޖެންޑާ މިނިސްޓަރުކަންވެސް އެކަމަނާ ވަނީ އަދާކުރައްވާފައެވެ. އަދި ސާކް ޖަމިއްޔާގެ ސެކްރެޓަރީ ޖެނެރަލްކަމުގެ މަޤާމާއި، ރައްޔިތުންގެ މަޖިލީހުގެ މެންބަރުކަން ވެސް އެކަމަނާ ކުރިން ކުރައްވާފައިވެއެވެ.
ތަޢުލީމީ ގޮތުން ބަލާއިރު، ދިޔާނާ ވަނީ އޮސްޓްރޭލިއާގެ ޔުނިވާސިޓީ އޮފް ޓެސްމޭނިއާއިން ބެޗެލާސް އޮފް ލޯސް ހާސިލުކުރައްވާފައެވެ. އޭގެ އިތުރުން ޖަޕާނުގެ ޔުނިވާސިޓީ އޮފް އޮސާކާއިން ގާނޫނާއި ޕޮލިޓިކަލް ސައިންސްގެ ރޮނގުންނާއި، އިނގިރޭސިވިލާތުގެ ލެސްޓާ ޔުނިވާސިޓީން ބައިނަލްއަޤުވާމީ އިންސާނީ ހައްޤުތަކާ ބެހޭ ރޮނގުން މާސްޓާ އޮފް ލޯސް ހާސިލުކުރައްވާފައިވެއެވެ.
