އެމްޑީޕީގެ ތެރޭގައި އުފެދުނު ބާރުވެރިކަމުގެ ހަނގުރާމައާއި، އެ ޕާޓީގެ ޗެއަރޕާސަން ހޮވުމަށް ބޭއްވި އިންތިޚާބަކީ ސަރުކާރުގެ ކުންފުނިތައް ހަލާކުކޮށްލުމަށް ލިބިގެންދިޔަ ”އީދެއް“ ކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެންބަރު އިބްރާހީމް ސުޖާއު ވިދާޅުވެއްޖެއެވެ.
މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި ވާހަކަދައްކަވަމުން ސުޖާއު ވިދާޅުވީ، ކުންފުނިތަކަށް މުވައްޒަފުން ނުބައްދަލު މިންވަރަށް އިތުރުކުރުމާއި، އެއްވެސް އުސޫލެއް ނެތި ”ފީނިފީނި“ އަށް ވަޒީފާތައް ދިނުމާއި ޕްރޮމޯޝަން ދިނުމުގެ ސަގާފަތެއް ފެށިގެން ދިޔައީ ނިމިދިޔަ އެމްޑީޕީ ސަރުކާރުގެ ތެރޭގައި ކަމަށެވެ. އެމްޑީޕީގެ ޗެއަރޕާސަން އިންތިޚާބު ވެގެން ދިޔައީ ކުންފުނިތައް ހަލާކުކޮށްލާ ކުންފުނިތަކުގެ ޒަމާން ދުއްވާލުމަށްޓަކައި ލިބިގެން ދިޔަ އާ އީދަކަށް ކަމަށް އޭނާ ސިފަކުރެއްވިއެވެ.
ސުޖާއު އިތުރަށް ތަފްސީލު ދެއްވަމުން ވިދާޅުވީ، ކުރީގެ ރައީސް އިބްރާހިމް މުޙައްމަދު ޞާލިޙުގެ ފެކްޝަނުން ފައްޔާޒް އިސްމާއިލް އަދި ކުރީގެ ރައީސް މުޙައްމަދު ނަޝީދުގެ ފެކްޝަނުން އިމްތިޔާޒް ފަހުމީ ވާދަކުރެއްވި އެ އިންތިޚާބުގައި، ބާރުވެރިކަން ހޯދުމަށްޓަކައި ދައުލަތުގެ ވަސީލަތްތައް ނަހަމަ ގޮތުގައި ބޭނުންކުރި ކަމަށެވެ.
ޚާއްޞަކޮށް، ރަށްރަށުގައި ހުރި ފެނަކަ ކޯޕަރޭޝަންގެ ބްރާންޗްތަކަށް ބޭނުން ނުވާ މިންވަރަށް މުވައްޒަފުން ވައްދައި، އެންމެ ތާއީދު ބޮޑީ ކާކުތޯ ބެލުމުގެ ސިޔާސީ ވާދަވެރިކަމެއްގެ ތެރެއިން އެ ކުންފުނި ”ފުނޑުފުނޑުކޮށްލާފައިވާ“ މަންޒަރު ފެނިގެން ދިޔަ ކަމަށް އޭނާ ފާހަގަކުރެއްވިއެވެ.
މެންބަރު ވިދާޅުވި ގޮތުގައި، މި ކަންކަމަކީ ހަމައެކަނި ސިޔާސީ ގޮތުން ދައްކާ ވާހަކަތަކެއް ނޫން ކަމަށާއި، އޮޑިޓް ރިޕޯޓްތަކުން ވެސް މި ހަގީގަތްތައް ފެންނަން އެބަހުރި ކަމަށެވެ. ކުންފުނިތަކުގެ މާލީ ހާލަތު ދަށަށް ގޮސް، ހިންގުން ބޮއްސުންލައިގެން ދިޔައީ އެމްޑީޕީގެ އެތެރޭގެ އިންތިޚާބުތަކަށް ނުފޫޒު ފޯރުވުމަށް ހިންގި މިފަދަ އަމަލުތަކުގެ ސަބަބުން ކަމަށް ސުޖާއު ތުހުމަތު ކުރެއްވިއެވެ.
ސުޖާއު ވަނީ މިފަދަ ޒިންމާދާރުކަން ކުޑަ އަމަލުތަކުގެ ސަބަބުން ދައުލަތުގެ ކުންފުނިތަކަށް ލިބުނު ބޮޑެތި ގެއްލުންތަކުން އަރައިގަތުމަށް ރައީސް ޑރ. މުޙައްމަދު މުއިއްޒުގެ ސަރުކާރުން މިއަދު ބޮޑެތި ގޮންޖެހުންތަކާ ކުރިމަތިލާން ޖެހިފައިވާ ކަން ފާހަގަކުރައްވާފައެވެ.
