މި ސަރުކާރުން ކުރަމުން ގެންދާ މަސައްކަތްތަކުގެ ފެންވަރު މާލޭގެ ބޭރުމަގުން ފެންނަން ހުންނާނެ ކަމަށާއި، އަމީނީ މަގުގެ މަސައްކަތުން ފެންނަމުން ދަނީ ކުރީގެ އެމްޑީޕީ ސަރުކާރުގެ މަސައްކަތުގެ ފެންވަރު ކަމަށް ކޮންސްޓްރަކްޝަން އެންޑް އިންފްރާސްޓްރަކްޗާ މިނިސްޓަރު ޑރ. އަބްދުالله މުއްތަލިބު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މެންބަރަކު ކުރެއްވި ސުވާލަކަށް ޖަވާބު ދެއްވަމުން މިނިސްޓަރު ވިދާޅުވީ، އަމީނީ މަގު ތަރައްގީ ކުރުމުގެ މަސައްކަތް ރޯޑް ޑިވެލޮޕްމަންޓް ކޯޕަރޭޝަން (އާރުޑީސީ) އިން ކުރިއަށް ގެންދިޔައީ، އެކަމުގެ އެއްވެސް ތަޖުރިބާއެއް ނެތް ބަޔަކު އިންޑިއާއިން މެނުއަލް މެޝިނެއް ގެނެސްގެން ކަމަށެވެ.
އެ މަސައްކަތް އެގޮތަށް ކުރިއަށް ގެންދަން ނިންމީ ކޮން އުސޫލަކުން ކަމެއް އެނގިވަޑައިނުގަންނަވާ ކަމަށް ވެސް މިނިސްޓަރު ވިދާޅުވިއެވެ.
މި ސަރުކާރު ވެރިކަމާ ހަވާލުވި އިރު އަމީނީ މަގުގެ އެ ސެގްމަންޓުގެ މަސައްކަތް އޮތީ ގާތްގަނޑަކަށް ނިމިފައި ކަމަށާއި، ނަމަވެސް މަގު ބަންދުކޮށްފައި ނުބޭއްވުމަށްޓަކައި އެ މަސައްކަތް ނިންމުމުގެ ފުރުސަތު ދެއްވީ ކަމަށް މިނިސްޓަރު ފާހަގަކުރެއްވިއެވެ.
އާރުޑީސީން އަމިއްލައަށް ތާރުއެޅުމުގެ ގާބިލުކަން ހުރި ކަމަށް ބަލައިގެން ކުރި މަސައްކަތުގެ ނަތީޖާ މިއަދު އަމީނީ މަގުން ފެންނަން އެބައޮތް ކަމަށް މިނިސްޓަރު ވިދާޅުވިއެވެ.
އޭގެ އިދިކޮޅަށް، މި ސަރުކާރުން ކުރަމުން ގެންދާ މަސައްކަތްތަކުގެ ފެންވަރު ރައްޔިތުންނަށް ސާފުކޮށް ފެންނާނެ ކަމަށާއި އޭގެ މިސާލަކަށް މާލޭގެ ބޭރުމަގު ހިމެނޭ ކަމަށް ވެސް މިނިސްޓަރު ޑރ. މުއްތަލިބު ވިދާޅުވިއެވެ.
