ބ. ކިހާދޫއާއި އެ އަތޮޅު ކުޑަރިކިލުގެ ފެނާއި ނަރުދަމާގެ މަޝްރޫޢު އަންނަ އަހަރުގެ އޮކްޓޯބަރު މަހުގެ ނިޔަލަށް އެއްކޮށް ނިންމައި، ރައްޔިތުންނަށް ޚިދުމަތް ދިނުމަށް ސަރުކާރުން މަސައްކަތްކުރަމުންދާ ކަމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
ރައްޔިތުންގެ މަޖިލީހުގެ ޖަލްސާއެއްގައި ކެންދޫ ދާއިރާގެ މެންބަރު މަޢުރޫފް ޛާކިރު ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ، މި ދެ ރަށުގެ މަސައްކަތް ވެސް މިހާރު ހަވާލުކޮށްފައިވަނީ މޯލްޑިވްސް ވޯޓަރ އެންޑް ސްވަރޭޖް ކޮމްޕެނީ (އެމްޑަބްލިއުއެސްސީ) އާ ކަމަށެވެ. އެ މަޝްރޫޢުތައް ކުރިން ހަވާލުކޮށްފައި އޮތީ ފެނަކަ ކޯޕަރޭޝަނާ ކަމަށާއި، ނަމަވެސް އެ ކުންފުނިން އެ މަސައްކަތްތައް ކުރިއަށް ނުގެންދެވި ހުއްޓިފައި އޮތުމުން، އެއްބަސްވުންތައް ބާތިލުކޮށް އެމްޑަބްލިއުއެސްސީއާ ހަވާލުކުރީ ކަމަށް ވަޒީރު ވިދާޅުވިއެވެ.
ވަޒީރު ފާހަގަކުރެއްވި ގޮތުގައި، ކިހާދޫގެ މަސައްކަތް ފެނަކައާ ހަވާލުކުރީ 2021 ވަނަ އަހަރުގެ ޑިސެމްބަރު މަހުގެ 29 ވަނަ ދުވަހު 40 މިލިއަން ރުފިޔާއަށެވެ. މަސައްކަތުގެ 16 އިންސައްތަ ނިމުނު ފަހުން އިތުރު ކުރިއެރުމެއް ނުލިބި ހުއްޓިފައި އޮތީ، މަސައްކަތް ހަވާލުކުރި އަގަށްވުރެ ބޮޑު އަގެއްގައި ސަބްކޮންޓްރެކްޓް ކުރަން ޖެހުމުން ކަމަށް ފެނަކައިން މައުލޫމާތު ދީފައިވާ ކަމަށް ވެސް ވަޒީރު ވިދާޅުވިއެވެ.
މިހާރު އެމްޑަބްލިއުއެސްސީން އަމަލީ މަސައްކަތް ފަށާފައިވާއިރު، ދެ ރަށުގެ މަސައްކަތުން މިހާތަނަށް 10 އިންސައްތަ ނިންމާފައިވާ ކަމަށް ވަޒީރު ވިދާޅުވިއެވެ. މިހާރު ކުރިއަށްދަނީ އާރްއޯ ޕްލާންޓާއި ސްޓޯރޭޖް ޓޭންކްތައް ބެހެއްޓުމުގެ މަސައްކަތެވެ.
މި މައްސަލައާ ގުޅިގެން ވަޒީރު އިތުރަށް ވިދާޅުވީ ފެނަކައާ 20 ރަށެއްގެ ފެނާއި ނަރުދަމާ މަސައްކަތް ހަވާލުކޮށްފައި އޮތް ނަމަވެސް، އެފަދަ މަޝްރޫޢުތައް ހިންގުމުގެ ފަންނީ ތަޖުރިބާ އެ ކުންފުނީގައި ނެތް ކަމަށެވެ. އަދި މަސައްކަތްތައް ސަބްކޮންޓްރެކްޓް ކުރުމުގައި މާލިއްޔަތު ޤަވާއިދާ ޚިލާފުވެފައިވާކަން ފާހަގަކުރައްވައި، ސަރުކާރުގެ އަމާޒަކީ މި ދައުރުގެ ތެރޭގައި ހުރިހާ ރަށެއްގައި ފެނާއި ނަރުދަމާގެ ޚިދުމަތް ޤާއިމުކޮށް ރައްޔިތުންނަށް ފޯރުކޮށްދިނުން ކަމުގައި ވަޒީރު ޑރ. ޢަބްދުﷲ މުއްޠަލިބް ޔަގީންކޮށްދެއްވިއެވެ.
