އައްޑޫ ސިޓީގެ ލިންކްރޯޑުގައި ތާރު އެޅުމުގެ މަސައްކަތް ކުރުމަށްޓަކައި އައު ކުންފުންޏަކާ ހަވާލުކުރުމުގެ މަސައްކަތް ކުރަމުންދާ ކަމަށް ބިނާރާއި ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބު ވިދާޅުވެއްޖެއެވެ.
ރައްޔިތުންގެ މަޖިލީހުގެ މަރަދޫ ދާއިރާގެ މެންބަރު އަޙްމަދުދީދީ ކުރެއްވި ސުވާލަކަށް ޖަވާބު ދެއްވަމުން ވަޒީރު ވިދާޅުވީ، ލިންކްރޯޑުގެ މަސައްކަތް މިހާރު ކުރިއަށްދަނީ ސަރުކާރުން މެޝިނަރީޒް ހޯދައިގެން ކަމަށެވެ. އަދި އެ މަޝްރޫޢު ވީހާވެސް ޚަރަދު ކުޑަކޮށް ކުރިއަށްގެންދިޔުމަށް މަސައްކަތް ކުރަމުންދާކަން ފާހަގަކުރައްވައި، މަސައްކަތް ހަވާލުކޮށްފައިވަނީ ސީދާ ކޮސްޓް ޕްރައިޒްގައި ކަމަށް ވަޒީރު ވިދާޅުވިއެވެ. މި މަޝްރޫޢު ފުރިހަމައަށް ނިންމުމަށް ގާތްގަނޑަކަށް 400 މިލިޔަން ރުފިޔާ ޚަރަދުވާނެ ކަމަށް ވަޒީރު ލަފާކުރެއްވިއެވެ.
ވަޒީރު ވިދާޅުވި ގޮތުގައި މިހާރު ކުރިއަށްދަނީ މަގު ސާފުކުރުމުގެ މަސައްކަތެވެ. އައްޑޫ ލިންކްރޯޑުގައި ތާރު އެޅުމުގެ މަސައްކަތް ވަކި ބަޔަކާ ހަވާލުކުރުމުގެ މަސައްކަތް ކުރަމުންދާއިރު، މި މަޝްރޫޢުގެ ތެރޭގައި ހިމެނޭ އެހެނިހެން މަގުތަކުގެ މަސައްކަތް ކުރިއަށް ގެންދާނީ އާރްޑީސީންނެވެ.
މި މަޝްރޫޢުގެ ދަށުން ހިތަދޫ، ފޭދޫ، އަދި މަރަދޫ ހިމެނޭ ގޮތަށް ޖުމްލަ 3 މަގެއްގެ މަސައްކަތް ކުރިއަށްދާނެއެވެ. މީގެ ތެރޭގައި 67.58 ކިލޯމީޓަރުގެ މަގު ހެދުމާއި، ފެންހިންދާ ނިޒާމު ޤާއިމުކުރުމާއި، ސީޓީބީ މަގުތައް ތާރު އަޅައިގެން ތަރައްޤީ ކުރުމުގެ އިތުރުން މިހާރު ހުރި ތާރު މަގުތަކުގެ މަތީގައި އިތުރު ފަށަލައެއް އެޅުން ހިމެނެއެވެ. ލިންކްރޯޑު އަލުން ތަރައްޤީ ކުރުމުގެ ތެރެއިން 150 މިލިމީޓަރުގެ ސީޓީބީ ފަށަލައަކާއި، 40 މިލިމީޓަރުގެ ބޯމިނުގެ ތާރު އެޅުމަށް ވަނީ ހަމަޖެހިފައެވެ.
މީގެއިތުރުން ހައިވޭގެ 4 ލޭން ހިމެނޭ ސަރަހައްދުތަކުން ވިނަ ނޮޅައި ސާފުކުރުމާއި، މިހާރު ހުރި ދުވާރުތަކާއި ތާރުތައް ކޮނެގެން ނެގުމުގެ މަސައްކަތް ކުރިއަށްދާނެއެވެ. މަޝްރޫޢުގެ ތެރެއިން މަގުތަކުގައި ދުވާރު ހެދުމާއި، މަގުމަތީގެ ނިޝާންތައް ހަރުކުރުމާއި، ބައިބައި ވަކިކުރުމަށް ފާރު ބިނާކުރުން ފަދަ މަސައްކަތްތައް ހިމެނޭ ކަމަށް މިނިސްޓްރީން ބުނެފައިވެއެވެ.
