މާލޭގެ އަމީނީމަގު ތަރައްޤީކުރުމުގެ މަޝްރޫޢުގެ ދަށުން ކުރިއަށްދާ މަރާމާތުގެ މަސައްކަތްތަކާ ގުޅިގެން، މިއަދުން ފެށިގެން އާޓީއެލް ބަހުގެ ރޫޓުތަކަށް ބޮޑެތި ބަދަލުތަކެއް ގެނައުމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ނިންމައިފިއެވެ.
އެމްޓީސީސީން ނެރުނު ނޯޓިސްއެއްގައިވާ ގޮތުން، އަމީނީމަގު ހެދުމުގެ މަސައްކަތް އަލުން ފެށިފައިވާތީ، ކަސްޓަމަރުންގެ ލުއިފަސޭހައަށްޓަކައި ބަސް ދަތުރުތަކަށް ވަނީ އަންނަނިވި ބަދަލުތައް ގެނެސްފައެވެ:
ބަސް ރޫޓުތަކަށް އަންނަ ބަދަލުތައް:
R7, R3, R1 އަދި R15 ރޫޓު: މާލޭގައި މި ރޫޓުތަކުގެ ބަސްތައް މަޑުކުރާނެ އެންމެ ފަހު ސްޓޮޕަކީ މާފަންނު ބަސް ޓާމިނަލްއެވެ.
R10 (އޯކިޑް ރޫޓް): މި ރޫޓުގެ ދަތުރުތައް ފެށުމާއި ނިންމުން ވަނީ ވެސްޓް ޕާކް ބަސް ސްޓޮޕަށް ބަދަލުކޮށްފައެވެ.
މަގު ބަންދުވުމުގެ ސަބަބުން ދަރުމަވަންތަ ހޮސްޕިޓަލް، ސޯޝަލް ސެންޓަރ އަދި އައިޖީއެމްއެޗް ބަސް ސްޓޮޕްތަކަށް މި ރޫޓުން ދޭ ޚިދުމަތް ވަގުތީގޮތުން މެދުކަނޑާލެވޭނެއެވެ.‘
R11 (އަމީނީ ރޫޓް): އަމީނީމަގުގެ މަސައްކަތް ކުރިއަށްދާ ވަގުތު މި ރޫޓުގެ ޚިދުމަތް މުޅިން މެދުކަނޑާލެވޭނެއެވެ.
އެމްޓީސީސީން ބުނިގޮތުގައި މި ބަދަލުތަކަކީ މަގު ހެދުމުގެ މަސައްކަތް ސަލާމަތީގޮތުން ރައްކާތެރިކަމާއެކު ކުރިއަށް ގެންދިއުމަށްޓަކައި ގެނެވުނު ބަދަލުތަކެކެވެ. މި ބަދަލުތަކުގެ ސަބަބުން ކަސްޓަމަރުންނަށް ދިމާވެދާނެ ދަތިތަކަށް އެ ކުންފުނިން ވަނީ މާފަށް އެދިފައެވެ.
ބަސް ދަތުރުތަކާ ގުޅޭ އިތުރު މަޢުލޫމާތު ސާފުކުރުމަށް އެމްޓީސީސީގެ ހޮޓްލައިން ނަންބަރު 1650 އަށް ގުޅުއްވުމަށް އެ ކުންފުނިން އިލްތިމާސްކުރެއެވެ. އަމީނީމަގު ޒަމާނީ ފެންވަރަށް ތަރައްޤީކުރުމަކީ ސަރުކާރުން މާލޭގެ މަގުތަކުގެ ފެންވަރު ރަނގަޅުކުރުމަށް ކުރިއަށްގެންދާ މުހިންމު މަޝްރޫޢެކެވެ.
އަމީނީމަގު އަލުން މަރާމާތުކުރަން ޖެހިފައިމިވަނީ މިދިޔަ އެމްޑީޕީ ސަރުކާރުން 84 މިލިއަން ރުފިޔާ ޚަރަދުކޮށްގެން ދަށް ފެންވަރުގައި އަމީނީމަގު ހެދުމުގެ ސަބަބުން މަގަށް 1 އަހަރު ނުވަނީސް މުޅި މަގުގެ އެތަން މިތަނުގައި ވަޅުގަނޑުހެދި މަގުން ދަތުރުކުރާ ފަރާތްތައް ނުރައްކަލަކަށް ހުށަހެޅިފައިވާތީއެވެ.
