މާލޭގެ އަމީނީމަގު މަރާމާތުކުރުމުގެ މަސައްކަތް ފެށުމަށްޓަކައި، އެ މަގުގެ ބައެއް ސަރަހައްދުތައް އާންމު ދަތުރުފަތުރަށް ބަންދުކުރުމަށް ނިންމާފައިވާ ކަމަށް ދިވެހި ފުލުހުންގެ ހިދުމަތުން ހާމަކޮށްފިއެވެ.
އަމީނީމަގު މަރާމާތް ކުރުމުގެ މަސައްކަތުގެ ފުރަތަމަ ސެގްމަންޓްގެ އަމަލީ މަސައްކަތް ފެށީ 2026 އޮގަސްޓް 2 ވާ އާދީއްތަ ދުވަހުއެވެ. މި މަސައްކަތަށް މަގު ތައްޔާރުކުރުމުގެ ގޮތުން، ރޭ މެންދަމު 00:00 އިން ފެށިގެން އެ ސަރަހައްދުގެ ޓްރެފިކް ފްލޯއަށް ބަދަލުތަކެއް ގެނެސް، އާންމު ދަތުރުފަތުރަށް އެ ސަރަހައްދު ވަނީ ބަންދުކޮށްފައެވެ.
މަގު ބަންދުކުރުމުގެ ކުރިން ފުލުހުން ވަނީ، މަސައްކަތް ކުރިއަށްދާ ސަރަހައްދުގައި ޕާކުކޮށްފައިވާ އުޅަނދުތައް 2026 އޮގަސްޓް 2 ވަނަ ދުވަހުގެ ރޭ 00:00 ގެ ކުރިން އެ ސަރަހައްދުން ނެންގެވުމަށް އިލްތިމާސްކޮށްފައެވެ. މި ބަދަލާ ގުޅޭ ޓްރެފިކް ޗާޓުވެސް ފުލުހުން ވަނީ އާންމުކޮށްފައެވެ.
މި މަސައްކަތަކީ މާލޭގެ މަގުތައް ރަނގަޅު ފެންވަރަކަށް ތަރައްގީކުރުމަށް ކުރިއަށްގެންދާ މުހިންމު މަޝްރޫއެކެވެ. މަގު ބަންދުކުރުމުގެ ސަބަބުން އާންމު ރައްޔިތުންނަށް ދިމާވެދާނެ ދަތިތަކަށްޓަކައި ފުލުހުން ވަނީ މައާފަށް އެދިފައެވެ. އަދި މިފަދަ ކަންކަމުގައި އާންމު ރައްޔިތުންގެ ފަރާތުން ލިބޭ އެއްބާރުލުމަށް ފުލުހުން ވަނީ ޝުކުރު އަދާކުރައްވާފައެވެ.
އަމީނީމަގު އަލުން މަރާމާތުކުރަން ޖެހިފައިމިވަނީ މިދިޔަ އެމްޑީޕީ ސަރުކާރުން 84 މިލިއަން ރުފިޔާ ޚަރަދުކޮށްގެން ދަށް ފެންވަރުގައި އަމީނީމަގު ހެދުމުގެ ސަބަބުން މަގަށް 1 އަހަރު ނުވަނީސް މުޅި މަގުގެ އެތަން މިތަނުގައި ވަޅުގަނޑުހެދި މަގުން ދަތުރުކުރާ ފަރާތްތައް ނުރައްކަލަކަށް ހުށަހެޅިފައިވާތީއެވެ. މިއީ ނިމިދިޔަ އެމްޑީޕީގެ ސަރުކާރުން ރައްޔިތުންގެ ފައިސާ އިސްރާފުކޮށް ރައްޔިތުންނަށްވީ ބޮޑު ޚިޔާނާތެކެވެ.
